Алай йисан октябрдин вацран сифте йикъара Махачкъалада Дагъустандин кIвенкIвечивал патал 1996-1997-йисара хайи жаванрин арада самбодай кьиле фейи акъажунра чи райондин самбодинни дзюдодин спортшколадин тербиячийри иштиракна.
Заланвилин гьар категорийрай кьиле фейи и акъажунра и спортшколадин тербиячияр тир Рамазанов Тимура (52 кг) ва Къурбанов Ибрагьима (65кг), чпихъ галаз гьасирдал экъечIай спортсменрин винел гьар сада 4 сеферда гъалибвал къазанмишуналди, 3-призовой чкаяр кьуна. Абур талукь тир дережайрин дипломар ва буьруьнждин медалар гуниз лайихлу хьана.
Агьмедов Къариба (70 кг) ва Исрафилов Руслана (75 кг) 5-6 чкаяр кьуна.
Алай йисан 12-13-октябрдин йикъара Махачкъалада Али Алиеван тIварунихъ галай спорткомплексда Дагъустандин кIвенкIвечивал патал 23 йисал кьван фидалди яшда авай (1991-1995-йисара хайи) жаванрин арада самбодай акъажунар кьиле фена.
Къизгъиндаказ кьиле фейи и акъажунра и спортшколадин тербиячияр тир Аскеров Руслана (68кг), Къурбанов Аслана (82 кг) 1-чкаяр, Алискеров Икрама (90 кг) 3-приздин чка кьуна.
Абур физкультурадинни спортдин рекьяй ДР-дин министерстводин талукь тир дережайрин дипломриз ва медалриз лайихлу хьана.
Абидин Камилов