Районда физкультурадинни спортдин кIвалах вилик тухуниз йисалай-суз артух фикир гуни, цIийи спорткомплексар, спортзалар ва спортдин майданар кардик кутуни хъсан нетижаярни гузва.
Сагълам уьмуьр хкязавай жаванрин ва жегьилрин кьадар къвердавай артух хьунихъ галаз санал чи райондай са шумуд спортсмен спортдин гьар жуьрейрай дуьньядин чемпионвилин чIехи тIварар гуниз лайихлу хьанва. Им шад жедай кIвалах я.
Вич кардик акатна са акьван гзаф йисар хьанвачтIани, самбодай ва дзюдодай мастеррин арада дуьньядин чемпионар-тренерар тир стхаяр – Рамазан ва Тельман Къурбановрин инициативадалди, масабурун куьмекарни галаз, чпин хсуси такьатрин гьисабдай Алидхуьрел эцигна кардик акатнавай самбодинни дзюдодин спортзалда вердишвилер къачузвай жегьил спортсменри чи республикадилайни къеце чIехи акъажунра чпикай хабар гузва.
Муаллимрин Йикъан суварин вилик чи редакциядиз чпин тербиячийри и мукьвара къазанмишнавай кубок, грамотаяр ва шикиларни гваз и ДЮСШ-дин тренер Къурбанов Тельман атана.
Вичихъ галаз хьайи суьгьбетда ада къейд авурвал, 23-сентябрдиз Москвада Россиядин кубок патал женгинин самбодай кьиле фейи акъажунра Дагъустандин хкянавай командадин составдик кваз иштирак авур и спортшколадин тербиячи Россиядин спортдин мастер Алискеров Икрама 82 килограмм заланвиляй вичихъ галаз гьасирдал экъечIай 5 спортсмендин винел гъалибвал къазанмишна. Финалда, Московский областдин патай женгиниз экъечIнавай спортдин и жуьредай дуьньядин чемпион Мурад Керимовал гъалибвал къазанмишуналди, Россиядин кубок къачуна. Ада алай йисуз Москвада дуьньядин кубок патал кьиле фидай акъажунра иштиракда. Къейд ийиз кIанзава хьи, Алискеров Икрам Росиядин кIвенкIвечивал патал жаванрин арада самбодай кьиле фейи акъажунрин призер, женгинин самбодай СКФО-дин чемпион, гьакIни Россиядин кIвенкIвечивал патал алай йисуз кьиле фейи акъажунрин чемпион я.
Чаз и виниз тир агалкьунар тебрик авунихъ галаз санал, чаз чи жегьил спортсмендихъ ва адан тренеррихъ мадни ч1ехи нетижаяр хьана кIанзава.
Абидин Камилов