«Сулейман-Стальский район» муниципальный райондин Кьил Нариман Шамсудинович Абдулмуталибован теклифдалди Кьасумхуьрел алай йисуз сифте яз пуд вацран къене пуд лагьай сеферда жуьреба-жуьре шейэр ва продукция маса гузвай ярмарка кьиле физватIани, акI я хьи, ада райондин, адан агьалийрин уьмуьрда вичин чка кьунва.
Чна виликдайни газетда кхьейвал, ярмаркада Россиядин гзаф шегьеррай, иллаки Кеферпатан Кавказдин регионрай атанвай карчийри ва шей гьасилзавайбуру чпин продукция ва жуьреба-жуьре маса шейэр маса гузва.
Ингье, чун гъиле авай гьафтеда пуд юкъуз кьиле фейи ярмаркада ава.
-Зун Ставрополдин крайдин Ессентуки шегьерда кардик квай «Забота» ООО-дин векил Александра Никитина я, - танишвал гузва парталар маса гузвай дишегьлиди.-Куь районэгьлияр гьуьрмет-хатур ийидай, мугьманперес халкь я. Гьавиляй чун иниз пуд лагьай сеферда атанва.
Патав хьиз са дишегьлиди «Кизляр Урицкий» якIун комбинатдин продукция маса гузва.
-Чи продукция агьалийри ашкъидивди маса къачузва,-лугьузва комбинатдин векил Светлана Михайловади. - Гьавиляй чун муьштерийрилай гзаф рази я.
Ихьтин разивилин келимаяр чаз Москвадин чайдин компаниядин, Ставрополдай вирт гъанвай карчийрини лагьана.
Чаз акурвал, карчияр, чпи гьасилнавай продукция гъанвай инсанар ярмарка кьиле физвай гьалдилай, шей маса къачузвай агьалийрилай рази я.
Ярмаркадикай райондин агьалийрихъ гьихьтин фикир ава?
- Ярмарка тешкилунилай чун, агьалияр, гзаф рази я, - лугьузва райондин аялрин яратмишунрин кIвалин директор Мурвет Милагьимова.- Ярмаркадиз гъанвай шейэрин ва продукциядин кьадар гзаф ва жуьреба-жуьре я. Яни, ярмаркади муьштерийрин игьтияжар таъминарзава. Мисал яз, за жуваз алукIдай куртка маса къачуна. Къиметни чи шегьеррин туьквенрин къиметрилай ужуз я.
-За ярмаркада вирт маса къачуна,-лугьузва Эминхуьряй тир Рамазан Асланова.—Аквазва хьи, еридизни, дадунизни хъсан ва тIеамлу я.
Кьасумхуьруьнви Алибутай Рамазанова, ЦIийи Макьарилай тир Мусаиб Абасмирзоева, чуьхверхуьруьнви Суна Таривердиевадини чаз ярмарка тухунилай, ана маса гузвай шейэрилайни продукциядилай разивал къалурна.
Эхь, ярмарка тухунилай, кьиле физвай гьалдилай гьам карчияр, гьам муьштерияр рази я. Лугьудайвал, кьве падни рази хьунилай хъсан кар авач.
Текст кхьейди Хазран Кьасумов я
