Райондин гуьне пата Шихидхуьруьн дереда авай «сельсовет Шихикентский» хуьруьн поселенидик са шумуд хуьр акатзава: Шихидхуьр, Бутхуьр, Зугьрабахуьр, Хтунар ва Пиперхуьр.
Гьелбетда, гзаф инсанар яшамиш жезвай и хуьрера, эхиримжи йисара тухузвай са жерге хъсан кIвалахрихъ галаз сад хьиз, са бязи кимивилер, гьялна кIанзамай месэлаярни амачиз туш. Абурун гьакъиндай райадминистрациядиз ва маса къуллугъриз агьалийрилай арзаяр ва тIалабунар авай чарарни къвезва. Абуруз чкадал фена килигун ва гьакIни «сельсовет Шихикентский» хуьруьн поселенидин администрациядин цIийиз эцигнавай дарамат шад гьалара ачухун патал 2-октябрдиз «Сулейман-Стальский район» муниципальный райондин Кьил Абдулмуталибов Нариман Шамсудинович, райадминистрациядин кьилин заместителар, гьар структурайрин, идарайрин руководителарни галаз гуьне патаз - Шихидхуьруьн дередиз мугьман хьана.
Шадвилин мярекат кьиле физвай чкадал агакьдалди вилик Н. Ш. Абдулмуталибов Асалдхуьруьн тамам тушир юкьван школадиз мугьман хьана, ана кIелунинни тербиядин кIвалах эцигнавай, гъвечIи классрин аялриз чими тIуьнар гун тешкилнавай, школа хъуьтIуьн шартIара кIвалах авуниз гьазур хьанвай гьалдихъ галаз таниш хьана, авай кимивилер арадай акъудун, талукь тир шартIар тешкилун патал мектебдин директор Тамамат Баламетовадиз тапшуругъар гана. Ахпа мугьманар хуьруьн культурадин кIвал ва медпункт алай чкадал фена.
Гуьгъуьнлай райондин Кьил, талукь къуллугъарни галаз, Бутхуьруьз фена. Хуьруьн кимел алай инсанрихъ галаз суьгьбетар авурдалай, дерди-гьалдикай хабарар кьурдалай, кьилдин ксарин арзайрихъ яб акалайдалай гуьгъуьниз, атанвай мугьманар и хуьруьн фельдшервилин пунктуна кIвалах тешкилнавай гьалдихъ галаз таниш хьана.
Бутхуьруьз физвай рекьин чапла пата цIийиз эцигнавай Шихидхуьруьн поселенидин администрациядин дарамат алай чкадал гзаф кьадар инсанар кIватI хьанвай: Шихидхуьруьн ва Испикрин поселенийрин администрацийрин кьилер, райондин ва хуьрерин Собранийрин депутатар, школайрин директорар, муаллимар, гъвечIи классрин аялар, хуьрерин агьалияр, культурадин работникар. И югъни, гатун югъ хьиз, рагъ авай, чимиди тир. Райондин культурадин Дворецдин музыкантри тамамарзавай макьамри дередик ван кутунвай.
Шихидхуьруьн поселенидин администрациядин цIийи дарамат ачухуниз талукьарнавай шадвилин мярекат кьиле тухузвайди тир Ярагьмед Ярагьмедова сифтегьан гаф «Сулейман-Стальский район» муниципальный райондин Кьил Абдулмуталибов Нариман Шамсудиновичаз гана.
Вичин рахунра ада къейд авурвал, эхиримжи йисара райондин руководстводи гуьне пата авай хуьрериз йисалай-суз артух фикир гузва ва инлай кьулухъни гуда. ИкI, муьгъ туькIуьрунихъ галаз санал, гила рекьер туькIуьрунив эгечIнава. Хуьрера авай мектебриз, бязи хуьрериз тIебиатдин газ гъанва ва и кIвалах давамарда. Хуьруьн поселенидин административный дарамат лап чIуру гьалда авай. И кар фикирда кьуна герек такьатар жагъурна, ихьтин гуьзел дарамат эцигна, талукь тир мебелни къачуна. Гьелбетда, хъувуна кIанзавай кIвалахарни гзаф ама: бейкарвал арадай акъудун, кIвалахдай чкаяр тешкилун, милли сеняткарвилер кIвачел ахкьалдар хъувун, малдарвал, магьсулдарвал вилик тухун, хуьрер хъвадай целди ва тIебиатдин газдалди таъминарун ва масабур.
- Чун район патал важиблу са жерге месэлаяр гьялун патал ДР-дин Президентдин патавни теклифар гваз фена, вири месэлаяр яваш-яваш гьялда, - лагьана ада.
Эхирдай Н. Ш. Абдулмуталибова Шихидхуьруьн поселенидин адми-нистрациядин коллективдиз цIийи дарамат мубаракна, тебрикдин хуш келимаяр лагьана.
Гуьгъуьнлай анал тебрикдин гафар, чпин теклифар, райондин руковод-стводин тIварцIиз чухсагъулдин келимаяр гваз Шихидхуьруьн юкьван школадин директор Айдаева Раида, Бутхуьруьн сифтегьан школадин директор Мегьтиханов Эрзихан, Гуьнейский сечкидин округдай райондин Собранидин депутат Гьасанов Закир, агъсакъал Сефералиев Абдулхаликь рахана.
ЦIийи дарамат ачухунин лишан яз яру лента атIун патал райондин Кьил Н. Ш. Абдулмуталибоваз, Шихидхуьруьн поселенидин кьил Н. Бабаеваз ва агъсакъал А. Сефералиеваз теклифна.
Дарамат шад гьалара ачухайдалай гуьгъуьниз анал кIватI хьанвайбуруз райондин гьевескар артистри ва «Куьре» хордин коллективди концерт гана.
Гуьгъуьнлай цIийи дараматда Н. Ш. Абдулмуталибова и хуьрерин посе-ленийрин кьилерихъ ва активдихъ галаз совещание кьиле тухвана ва арзачияр кьабулна.
А. Камилов
