4-октябрдиз райадминистрациядин заседанийрин залда муаллимрин Йикъан сувариз талукьарна шадвилин мярекат кьиле фена. Аниз райондин школайрин директорриз, земестителриз ва педагогвилин зегьметдин ветеранриз теклифнавай.
Анал сифте гаф рахай муниципальный райондин Кьил Абдулмуталибов Нариман Шамсудиновича, райондин депутатрин Собранидин, администрациядин ва вири халкьдин патай муаллимриз, педагогвилин зегьметдин ветеранриз чпин пешекарвилин сувар мубарак авунихъ галаз санал, чи район вири вахтара бажарагълу муаллимралди машгьур хьайиди къейдна.
- Чи акьалтзавай несилдиз чирвилер ва дуьз тербия гунихъ галаз санал, - къейдна Н. Ш. Абдулмуталибова, - алай, экстремизмди ва терроризмди халкьдик къурхуллувал кутазвай шартIа-рани муаллимрин зегьмет зурба я, абуру чи аялар дуьз рекье твазва. Чна чи муаллимрал гьар са чIавуз дамах ийизва.
Чи муаллимрихъ ва аялрихъ эхиримжи йисара республикадин ва Россиядин дережада гьар жуьре конкурсра ва олимпиадайра хъсан нетижаяр жезва, им шадвал ийиз жедай кар я. Гьа са вахтунда чирвилер гунин кIвалах алай аямдин истемишунрихъ галаз кьадайвал эцигун патал хъувуна кIанзавай кIвалахарни ама.
Вичин куьруь рахунрилай гуьгъуьниз Н. Ш. Абдулмуталибова мад сеферда муаллимриз ва ветеранриз чпин пешекарвилин сувар мубарак авуна ва анал чеб кIвалахда тафаватлу хьайи са шумуд муаллимдив райондин грамотаяр шад гьалара вахкана.
Гуьгъуьнлай анал тебрикдин хуш келимаяр гваз рахай РУО-дин начальник Ж. А. Асланова алай вахтунда райондин школайра 8 агъзурдалай виниз аялри кIелзавайди ва абуруз 2 агъзурдалай виниз муаллимри, тренерри ва тербиячийри чирвилер ва тербия гузвайди лагьана. Гьукуматди ва государстводи образованидин хилез йисалай-суз артух фикир гузвайди къейд авунихъ галаз санал, ада гьар са муаллимди ва тербиячиди вичин кIвалах алай аямдин истемишунрихъ галаз кьадайвал эцигун чарасуз тирдини лагьана.
Суварин мярекатдал тебрикдин хуш келимаяр ва чпин кIвалахдикай куьруь информацияр гваз КIварчагърин хуьруьн СОШ-дин биологиядин тарсар гузвай муаллим Къадималиева Гьуьруьят, кIелзавайбурун патай Кьасумхуьруьн 1-нумрадин СОШ-дин ученица Жафарова Заира, гьа и школадин лезги чIаланни литературадин муаллим Хаметова Светлана рахана.
Абурун рахунрин арайра райондин культурадин Дворецдин гьевескар артистар тир Селимат Гьажиевади, Азим Ризаева, Тофик Мегьамедова ва и мярекатдин художественный пай кьиле тухузвайди тир райондин аялрин яратмишунрин КIвалин директор Мурвет Мелагьимова чи шаирри муаллимриз, чи дидейриз, хайи Ватандиз бахшна кхьенвай манияр лугьуналди залда ацукьнавайбурун гуьгьуьлар мадни шадарна, абурук халисан суварин гьевес кутуна.
Эхирдай райондин Кьил Н. Ш. Абдулмуталибова, муаллимрин мажибрин пулар гунин кIвалах вилик тухунихъ галаз санал, школаяр хъуьтIуьн шартIара кIвалах авуниз вахтундамаз ва вири патарихъай гьазурунизни кьетIен фикир гун герек тирди лагьана, школайрин руководителриз са бязи теклифар гана.
Абидин Камилов
