1-октябрдиз Цмуррин хуьруьн поселенидин администрациядин дараматда Цмуррин хуьруьн центрдал Гъалибвилин музей ачухунин гьазурвилер акунин жигьетдай тешкилнавай оргкомитетдин сад лагьай заседание хьана.
Адан кIвалахда «Сулейман-Стальский район» муниципальный райондин Кьил Абдулмуталибов Нариман Шамсудиновича, райадминистрациядин кьилин заместитель Савин Велиева, управленийрин, отделрин руководителри и хуьруьн поселенидин кьил Раида Алибеговади ва жавабдар маса работникри иштиракна.
Заседание Нариман Шамсудинович Абдулмуталибова ачухна ва кьиле тухвана. Вичин рахунра ада вич бажарагълу писателрални алимралди, генералралдини зегьмет кIани инсанралди машгьур тир и хуьре баркаллу кIвалахар давамарзавай (учебно-спортивный центр эцигна кардик кутунвай, Гъалибвилин музей эцигна куьтягьзавай) Шайдаеврин хзандиз, кьилди къачуртIа, Гьажикъурбан Гьажибалаевичаз чухсагъул лагьана, музей Гъалибвилин суваралди ачухун патал райондин администрациядин патайни вири жуьредин куьмекар гудайди, музей тадаракламишун патал 80 агъзур манат пул чара авунвайди, хуьруьн администрациядин цIийи дарамат эцигун фикирдиз къачунвайди, хуьруьхъ галай рекье къир цунин кIвалахни башламишдайди къейдна.
Гуьгъуьнлай анал рахай Шайдаев Гьажикъурбан Гьажибалаевича и хуьре кьиле тухузвай вири хъсан кIвалахрин тереф хуьнай, меслятар къалурунай, куьмекар гунай Нариман Шамсудиновичаз вичин ва гьакIни Цмуррин жемятдин патай еке чухсагъул лагьана ва музей вахтунда тадаракламишунин жигьетдай анал са жерге теклифар гъана.
И жигьетдай анал чпин фикирар ва теклифар гваз райадминистрациядин кьилин заместитель Савин Велиев, и музейдин директор Мегьамед Мегьамедов, хуьруьн клубдин заведующий Мусинат Нуралиева, школадин директор Нариман Агъабалаев, и хуьруьнви, райондин художественный школадин директор Ямудин Рамазанов, гьакIни Ярагьмед Ярагьмедов, Сажидин Саидгьасанов, и цIарарин автор, РУО-дин начальник Жабраил Асланов, Цмуррин хуьруьн администрациядин кьил Раида Алибегова ва маса юлдашар рахана.
Заседанидин кIвалахдиз эхирдай Нариман Шамсудинович Абдулмуталибова итог яна, гьар къуллугърин везифаяр тайинарна, герек тапшуругъар гана.
Абидин Камилов