Терроризмди ва экстремизмди кьил хкажнавай алай муракаб шартIара гзаф миллетар санал яшамиш жезвай Дагъустан Республика хьтин Россиядин Кьиблепатан акьалтIай сергьят тир стратегиядин еке метлеб авай регионда халкьарин милли алакъаяр мягькемарунихъ ва вилик тухунихъ еке метлеб ава.
И кар фикирда кьуна, 27-сентябрдиз Россиядин виридалайни къадим шегьер тир Дербентда Гьукуматдин лезгийрин муздрамтеатрда республикадин министерствойрин руководителар Кьиблепатан Дагъустандин районрин ва шегьеррин муниципальный тешкилатрин кьилерихъ ва активрихъ галаз гуьруьшмиш хьуниз, милли алакъаяр мягькемарунин ва вилик тухунин жигьетдай ДР-дин милли политикадин министерстводинни республикадин муниципальный тешкилатрин арада санал кIвалахунин гьакъиндай икьарарар кутIунуниз талукьарнавай совещание кьиле фена.
Совещанидин кIвалахда милли политикадин рекьяй ДР-дин министр А.Гьасанова, ДР-дин печатдин ва информациядин министр А.Аджиева, ДР-дин культурадин министрдин заместитель М.Мегьамедрасулова, милли политикадин рекьяй ДР-дин министрдин заместитель Т.Агьмедова, жегьилрин политикадин рекьяй комитетдин руководителди, Кьиблепатан Дагъустандин хуьрерин ва шегьеррин кьилери иштиракна.
Совещание «Дербент шегьер» шегьердин округдин Кьил Имам Музамудинович Яралиева ачухна. И мярекатдиз кIватI хьанвайбур тебрик авунихъ ва абурухъ кIвалахда агалкьунар хьана кIанзавайди къейд авунихъ галаз, ада милли алакъайрин жигьетдай санал кIвалах авунин икьрарар кутIунуни Кьиблепатан Дагъустанда ва санлай республикада ислягьвал, дуствал ва меслятвал гележегда мадни мягькем хьуниз куьмек гудайди къейдна.
Совещанидал рахай милли политикадин рекьяй ДР-дин министр А.П.Гьасанова къейдна хьи, муниципальный гьукум инсанриз виридалайни мукьва я. Дагъустан вичиз тешпигь авачир хьтин чка я, ана гзаф миллетар санал дуствилелди яшамиш жезва. Ам милли алакъайрин халисан лаборатория я. Ина яшамиш жезвай вири миллетри чеб-чпин хайи кIвале яшамиш жезвайди къейдзава, гьавиляй и карди ина милли акьунарни арадал гъизвач. И месэладай анал чпин фикирар гваз амай министрар ва абурун заместителарни рахана. Абуру залда ацукьнавайбурун патай атай са жерге суалризни тамам жавабар вахкана
Миллетрин арада санал кIвалахунин жигьетдай кутIун-завай икьраррин важиблувиликай рахадайла И.М.Яралиева къейд авурвал, Дербент шегьер гзаф ассира халкьарин арада меслятвал хьунин ва сад-садан гъавурда акьунин гьакъикъи чешне я. Ада гьакI вирибуруз «Россия 10» проектда чи республикадин надир имаратрикай сад тир «Нарын-Каладин» тереф хуьнин патахъай эвер гана.
Гуьгъуьнлай виликамаз гьазурнавай икьраррал шад гьалара къулар чIугуна. Эхирдай ана концертдин еке программа гана.
И мярекатда чи райондай «Сулейман-Стальский» район муниципальный райондин Кьил Нариман Шамсудинович Абдулмуталибов кьиле аваз чIехи делегацияди иштиракна. Абурун арада гьакI райадминистрациядин кьилин везифаяр тамамарзавайди тир Л.А.Оруджев, администрациядин кьилин заместитель С.М.Велиев, райондин са жерге общественный тешкилатрин руководителар, райондин культурадин ва информациядин отделдин, райондин СМИ-йрин векилар авай.
А. Камилов
