Малум тирвал, алай вахтунда вири чкайра, хийирдин хьиз, шийирдин кIвалахризни еке харжияр акъатзава.
И кар ва гьакIни инсанрин лайихлувилер фикирда кьуна, ДР-дин Гьукуматди 2012-йисан 6-сентябрдиз 303-нумрадик кваз кьабулнавай Постановленидин бинедаллаз регьметдиз фейи (телеф хьайи) Советрин Союздин Игитрин, Россиядин Федерациядин Игитрин, Баркаллувилин орденерин тамам кавалеррин, Социализмдин Зегьметдин Игитрин, Зегьметдин Баркалладин орденрин тамам кавалеррин сурарихъ акалддай сурун къванер гьазурунин ва сурухъ гилигунин къайда тестикьарнава.
И жигьетдай гьукуматдин патай талукь къуллугъар авун патал зегьметдин ва Дагъустан Республика социальный жигьетдай вилик тухунин Министерстводи тайинарнавай къайдада Административный регламент туькIуьрнава.
Ада тайинарнавайвал, Игитдин сурун кьилихъ гилигдай къван гьазурун ва акалун Игит вич кучуднавай чкада кьиле тухуда, са шартI аваз: эгер адан сурухъ маса чешнедин къван килиг тавунваз хьайитIа.
Гьукуматдин патай ихьтин куьмек гунихъ галаз алакъалу тир административный кIвалахар кьиле тухунин векилвилерни Министерстводин сергьятдин органрин-муниципальный районрин ва шегьеррин округрин агьалийриз яшайишдин жигьетдай къуллугъдай управленийрин хиве тунва.
Сурун къван гьазурунин ва акалунин къарар ва я и кIвалахдикай отказ авунин къарар, герек вири документарни галаз арза гайи йикъалай рабочий 10 йикъан вахтунда Министерстводин сергьятдин органри кьабулда.
Эгер Игит кечмиш хьайидалай гуьгъуьниз рабочий 20 йикъан вахтунда и жигьетдай гьукуматдин куьмек гун патал талукь ксарин арза тахьайтIа, и кIвалах агьалийриз яшайишдин жигьетдай къуллугъдай управленидин къарардин бинедаллаз кьиле тухуда.
УСЗН-ди къарар кьабулайдалай гуьгъуьниз рабочий 10 йикъан вахтунда Игитдин сурухъ гилигдай къван гьазурунин патахъай 2005-йисан 21-июлдиз 94-ФЗ нумрадик кваз кьабулай «О размещении заказов на поставки товаров, выполнении работ, оказании услуг для государственных и муниципальных нужд» Федеральный закондин истемишунрихъ галаз кьадайвал, тамамарзавай кIвалахдин икьрардин къимет тайинарда ва ам Министерстводиз ракъурда.
Чна винидихъ къейд авур чеб фад кечмиш хьайи Игитрин сурарихъ гьахьтин ва я маса чешнедин къванер галачиз аватIа, УСЗН-ри МО-рин администрацийрихъ галаз санал и жигьетдай серенжемар кьабулун ва тухвай кIвалахдин гьакъиндай 2013-йисан 20-сентябрдалди Министерстводиз информация агакьарун лазим я.
Идахъ галаз санал къейд ийиз кIанзава хьи, РФ-дин Пенсионный фондунин ДР-да авай отделенидин информациядалди сурун къван гьазуруниз ва сурухъ гилигуниз акъатзавай къиметдин умуми кьадарди 127 агъзур манатдилай виниз тушиз тешкилзава, къунши регионра ам 110-120 агъзур манатдилай виниз туш.
И. М. Нежведилов, ветеранрин крарин рекьяй УСЗН-дин отделдин начальник
