Рамазанов Шарафудин кларнет, зуьрне, далдам ядай устад – музыкант яз райондилай къецени машгьур я.
Адан алакьунриз гьар йисуз къадим Ахцегьа тухузвай лезгийрин игитвилин «Шарвили» эпосдин суварик, Кьасумхуьрел, Дербентда, Махачкъалада ва масанра тухвай фестивалрани конкурсра тамашачийри капар яна. Лауреатвилин дипломар, грамотаярни Ш. Рамазановахъ гзаф ава.
Гзаф йисара Ш. Рамазанова жуьреба-жуьре ВИА-рин руководителвиле, солиствилени кIвалахна.
Гьа са вахтунда, машгьур музыкантди вичин хайиди тир Эминхуьруьн Культурадин кIвалин директорвиле кIвалахизни 20 йисалай виниз я. Лугьуз жеда хьи, и девирда анаг хуьруьнвийрин рикI алай культурадин макандиз элкъвенва. Агьалийри ана чпин азад вахт менфятлудаказ кечирмишзава. Мус фейитIани, и маканда инсанар аваз аквада. Абурун ихтиярда газетарни журналар, шашкаяр, шахматар ава.
Культурадин кIвале экуь, михьи я, цларал жуьреба-жуьре плакатар, стендар ала. Ана 8 кружокни кардик ква. Абурун кIвалахда хуьруьнвийри, иллаки жегьилри активвилелди иштиракзава.
Бажарагълу музыкант кьиле авай Культурадин кIвале художественный самодеятельностдин хъсан коллектив кардик кваз хьун – имни тIебии кар я. 15 касдикай ибарат тир гьевескаррин коллективди хуьре ва районда тухузвай саки вири мярекатра иштиракзава. И карда гьевескарар тир Селим Селимован, Муслим Асаханован, Равшан Жигерован иштираквал иллаки екеди я.
Эхиримжи вахтара Культурадин кIвале ремонтрин кIвалахарни кьиле тухвана: къавуз цIийиз шифер яна, цлариз сувагъар хъияна, пол-потолокдиз ширер яна, цIийи ракIарар, дакIарар кутуна, тамашачийрин залда авай скамейкаярни къайдадиз хкана.
Вири ибур, гьелбетда, Шарафудин Рамазанован зегьметдин нетижа я. Адан кIвалахдилай хуьруьнвийри разивал ийизва.
Марсель Бабаев
