Кьасумхуьруьн юкьвал, пуд мертебадин административный дараматдин патав эцигнавай, гуьрчегдиз туькIуьрнавай «Баркалладин доскади» гьар са касдин фикир вичел желбзава.
Ана райондин карта ва райондин майданар, тарихдинни лишанлу чкаяр, инсанрин, хуьрерин кьадар къалурзавай делиларни рекъемар ганва. Мукьвара доскадиз чпин тIварар яргъарани машгьур хьанвай, район, общество, халкь патал баркаллу крар авур ва ийизвай кьегьал рухвайринни баркаллу рушарин – районэгьлийрин шикиларни акъудна. Гьар са шикилдин кIанихъай инсандин тIвар, адан лайихлувилер къалурзавай къейдер ганва. Чаз инал «Баркалладин доскадиз» шикилар акъуднавай инсанрин тIварарни кьаз кIанзава: лезги литературадин классикар Етим Эмин, СтIал Сулейман, Зияудин Эфендиев, Алибег Фатахов, СтIал Саяд, шаирар-фронтовикар СтIал Мусаиб, Балакъардаш Султанов, зурба алим, камалэгьли Гьасан Эфенди, конструктор, Социализмдин Зегьметдин Игит Генрих Гьасанов, композитор Готфрид Гьасанов, Россиядин Игит Радим Халикьов, алимар Унейзат Мейланова, Абуталиб Абилов, Маил Аминов, композитор Сейфуллагь Керимов, РФ-дин лайихлу артист Абдулкъадир Сайдумов, «Дербент шегьер» шегьердин округдин кьил Имам Яралиев, генералар Мегьамедгьанифа Шайдаев, Гьажикъурбан Шайдаев, Тагьир Аминов.
Райондин агьалийри ихьтин баркаллу кар авунвай – кьегьал, баркаллу инсанрин шикилар доскадиз акъудунай райондин руководстводиз чухсагъул лугьузва.
Хазран Кьасумов
