Герейханован хуьре Эмина Абумуслимова тийижир кас белки авач жеди. Вичин пешедал ашукь яз почтальонвиле кIвалахзавай Эминадилай хуьруьнвияр гзаф рази я. Хуьруьн кьве километрдилай виниз яргъивал авай рекье, гьар куьчеда, кIвале-кIвале къекъуьн регьят кар туш.
Алай вахтунда чаз Мегьарамдхуьряй хквезвай почтар гьа хкай юкъуз агьалийрал агакьарзава, абуруз гьакI бязи гъавурдик квачир месэлайрай, дуьньядин гьаларикай суьгьбетарни ийизва.
Эмина 1962-йисуз дидедиз хьана. 1978-йисуз Герейханован 1-нумрадин юкьван школа акьалтIарна. 1980-йисуз Махачкъаладин бухгалтервилин курсариз кIелиз фена. Анаг акьалтIарайдалай гуьгъуьниз Герейхановский совхоздин консервияр гьазурдай заводда бригадир, бухгалтер яз кIвалахна. Совхоз чкIайдалай кьулухъ я завод, я кIвалахдай чка амачир жегьил дишегьли почтальонвилиз финиз мажбур хьана.
Почтар вахкунилай гъейри, ада газетар, журналар кхьидай вахтунда агьалийрин кIвалериз физ, абруз багъри «Лезги газет», «Куьредин хабарар» газетар, «Кард», «Самур», «Дагъустандин дишегьли» журналар ва гьакIни урус чIалал акъатзавай маса газетар, журналар кхьихь лугьуз таблигъатдин кIвалахни тухузва.
- Чи почтадин работникри, алай вахт гьикьван муракабди ятIани, агьалийрихъ галаз вахтундамаз подпискадин патахъай суьгьбетар ийизва. Жуван дидедин чIалал акъатзавай газетар, журналар кхьин тавурла, бес ни кхьирай? – лугьузва Эминади.
Чина ачух хъвер авай, хуш къилихрин, мегьрибан дишегьли тир ада вичин хивевай жавабдар кIвалах кьуьд, гад талгьана, кьилиз акъудзава, сагърай вич.
Вадим Жамалдинов