Лугьудайвал, вири вахтуниз муьтIуьгъ я, вахт – са куьнуьзни.
ТIебиатдин къанун тирвал, вахтуни виликди еримишда.
Ам виликди фирдавай тIебиатни, къурулушарни дегиш жеда, инсаниятдин уьмуьрдани дегишвилер кьиле фида. Яргъал девирриз вил вегьин герек авач, эхиримжи 20-30 йисан девирда килиг гьикьван дегишвилер кьиле фенатIа: къудратлу СССР тахьай мисал хьана, гьа къурулушдин совхозарни амач, рабочийри кIвалахиз хьайи фабрика-заводни «халуйрин» гъиле гьатна…
Ихьтин фикирар зи кьилиз саки гьар юкъуз Эмин хуьряй Кьасумхуьрел кIвалахал къвез-хъифдайла Герейханован хуьруьн 1-отделенида аквазвай са «шикилди» гъана. Хуьруьн юкьвай фенвай шегьре рекьин агъа пата авай къванцин цал ракьукай чIехиз гьарфар атIана кхьенвай «СЛАВА» ва ширедалди кхьенвай «Совхоз в пятилетке» гафар алама. Зун гъавурда акьазва: им виликан, гьатта республикадилай яргъарани вичин тIвар машгьур хьайи, къазанмишай агалкьунрай Гьукуматдин наградайриз, гъиляй-гъилиз къведай Яру пайдахриз лайихлу хьайи «Герейхановский» совхоздин Гьуьрметдин доска тир. Эхь, советрин девирда ихьтин «доскаяр» вири майишатра, карханайра авай, анриз майишатдихъ хьанвай агалкьунар къалурзавай делиларни рекъемар, производстводин кIвенкIвечийрин шикилар акъудзавай. Им лап хъсан карни тир – шак алач. Амма, чна винидихъ лагьайвал, къе я советрин гьукумат, я совхозар амач, лугьудайвал, вахтар алатна. Жегьил несил «СЛАВА» гафунин гъавурдани бажагьат акьада, гзафбуруз и «пятилетка» гафунин манани чир тахьун мумкин я. Ваъ, инал заз я гьа, я къенин девирдин тариф-синих ийиз кIанзавач. Зи фикирдалди, хуьр-кIвални, инсанарни вахтунихъ, девирдихъ галаз виликди фин лазим я. ГьакI хьайила, виликан «Герейхановский» совхоздин Гьуьрметдин доскадини вичин девир фад кечирмишна. «Совхоз в пятилетке» гафар, абурун манани куьгьне хьанва. Абур тунихъ са метлебни авач.
Хазран Кьасумов