ДаркIушкъазмайрин хуьруьн библиотека агьалийри рикI алаз ял ядай, ктабар, журналар кIелдай чкайрикай сад я.
И рекьяй вичи ана кIвалахиз са акьван вахт туштIани, библиотекарь Шихметова Русминади библиотекадиз атай гьар садахъ галаз хушвилелди рахаз, адаз герек литература къалуриз жеда.
Библиотекада михьидаказ дезгейрал гьар разделриз чара авуна, кьилди-кьилди эцигнавай ктабрикай лезги шаиррин ва писателрин ктабри аквадай чка кьунва.
Алай вахтунда хуьр чIехи хьанва, гьардан кIвале телевизорар, гьатта «триколордин» тарелкаярни, бязибурун кIвалера компьютерарни аватIани, библиотекада кIелдайбур гьамиша аваз жеда.
КIвалериз тухуз ктабар кIелдайбурун кьадар вишелай виниз я. Русминади лугьузвайвал, гатун ва гьакIни маса каникулрин вахтунда иниз шегьерра кIелзавай гзаф хуьруьн школадин аялар, пенсионерар ва маса юлдашар мукьвал-мукьвал къвезва.
Библиотекадиз чкадин администрациядин кьил Келбялиев Назир Закировича вичелай алакьдай вири жуьредин куьмекар гузва: ана кIвалахзавай работникрин, библиотекадин гьакъиндай къайгъударвал ийизва, вахт-вахтунда герек тир шейэр къачузва. Имни, гьелбетда, рази жедай кар я. Анин работникри адаз еке чухсагъулни лугьузва. Эхь, библиотека хуьруьн агьалийрин рикI алай культурадин маканрикай сад хьанва.
Вадим Жамалдинов