Къадим Куьредин чилихъ кьетIенвилер гзаф ава. Кьегьал-жумарт, къанажагъдинни камалдин пай ганвай рикI михьи, гъил ачух, обществодиз, халкьдиз, хайи ватандиз вафалу гзаф кьадар инсанар гун – им чи чилин берекатдинни бегьерлувилин лишан тушни?!
Алатай вахтарин деринриз гьахь хъувунин са артух чарасузвал аваз аквазвач заз винидихъ гъанвай крарин гьахъвал тестикьар хъувун патал. Общество, район, хуьр-кIвал патал халкьдин патай баркалла ва аферин къведай кIвалахар авур ва ийизвай жумарт, мерд инсанар районда чи йикъарани тIимил авач. Абурукай сад «Россельхозбанкдин» Дагъустандин региональный филиалдин районда авай банкдин директор, кьасумхуьруьнви Мадрид Манатилов я. Хъсан къилихдалди, рикIин михьивилелди, лазимвал авай гьар са касдиз, жемятдиз куьмекдин гъил яргъи авуналди ам фадлай районэгьлийриз чида. Мукьвал йикъара Мадрид Манатилова хайи район, жемят патал баркалла къведай, мергьеметлувилин мад са кIвалах авуна: райцентрадал алай, фадлай ядни амачиз чIуру гьалда авай буллах (ихтилат муниципальный райондин административный дараматдинни почтадин дараматдин арада авай булахдикай физва) вичин хсуси такьатралди туькIуьр хъувуна, чиле ва чин пата, гьакI вилик квай гурара мрамордин плитаяр туна, гуьрчегарна.
Чаз малум хьайивал, булах икI гуьрчегдаказ туькIуьрун патал Мадрид Манатилова чпин кар хъсандиз ва мукьуфдивди чидай устIарар желбна. Къе чун вири шагьидар я: абуру кIвалах еке устадвилелди кьилизни акъудна. ЦIийиз туькIуьр хъувур булахдал вири кIвалахар кьилиз акъудна акьалтIарнавач, ана чин пад безетмишунин, инсанриз ял ягъиз ацукьдай чкаяр туькIуьрунин, яд гилигунин ва маса кIвалахар давам жезва.
Лагьана кIанда, Мадрид Манатиловаз булах туькIуьр хъувурди я лагьана чна вичин тIвар кьуна, газетдай раижна кIан хьанач.
- Булах за жуван жемят патал, суваб патал авур кар я, - лугьузва М. Манатилова.
Гьакъикъатдани, цин чешме, булах михьи авун, къайдадиз гъун – им сувабдин кар я. Яд уьмуьр я, гьавайда лугьузвач. Вилик девиррани чи хуьрера, эл-жемятдин мелер тешкилна, цин чешмеяр михьдай, анрилай хуьрериз яд гъидай, булахар эцигдай. Аквазва хьи, бубайрин хъсан адетар, крар къенин несилри хуьзва, давамзава. Кьегьал хва Мадрид Манатилова хьиз.
Булах туькIуьр хъувунал, баркаллу кар авунал «Сулейман-Стальский район» муниципаль-ный райондин Кьил Нариман Шамсудинович Абдулмуталибова разивал ийизва. Ада гьисабзавай-вал, Мадрид Манатилова, булах гуьрчег аквадайвал ва инсанриз къулай жедайвал туькIуьр хъувун – им жемятдин патай аферин къведай, сувабдин кар я. Ихьтин крар, кIвалахар анжах вичихъ бинедилай хъсан тербия, михьи рикI авай, райондихъ рикI кузвай, адан абадвиликай фикирзавай инсанрилай алакьда.
…Зун фотоаппаратдай шики-лар ягъиз цIийиз туькIуьр хъувунвай булахдин патав гва. Рекьяй агъадалди, винелди физвай инсанар булахдиз дикъетдивди килигзава, аквазва хьи, булахдин акунри абурун гуьгьуьлар шадарзава.
- Булах и къайдадиз гъайиди, вуж ятIани, Аллагьди бахтлу авурай, - лугьузва анал са шумуд декьикьада гьейранвализ акъвазай яшлу са дишегьлиди.
Халкьдин алхиш. Гьар са кас патал яраб адалай хъсан маса кар аватIа? Са рахунни алачиз, баркаллу кар авуналди Мадрид Манатилова вичел чан аламаз халкьдин рикIера вичиз гуьмбет эцигна.
Райондикай, адан абадвили-кайни мублагьвиликай, агьалий-рин яшайишдикай, дуланажагъдин шартIарикай фикирзавай Мадрид Манатилов хьтин кьегьал рухваяр Куьредин чилел, хуьрера мадни гзаф хьурай!
Хазран Кьасумов