Вини СтIалрин хуьряй тир Мегьамедов Къадир зегьметдал рикI алай, зегьмет вичин уьмуьрдин игьтияждай кьунвай лежбер итим я лагьайтIа, зун ягъалмиш жедач.
Ада хуьруьн производствода зегьмет чIугваз 25 йисалай виниз я. 2002-йисуз Къ. Мегьамедова виликан совхоздин куьгьне багъ хкудай участокдай 1 гектар чил арендада къачуна, ана ичин багъ кутуна. Иесивилелди гелкъуьнин, агротехникадин гьар са серенжем чпин вахтара ва ери аваз кьиле тухунин нетижада ана къе хъсан багъ арадал атанва. Къадира багъдай гьар йисуз ичерин хъсан бегьерни вахчузва, абур чкадал муьштерийриз маса гузва.
Чун Къ. Мегьамедован багъда къекъвезва. Аквазва хьи, ана михьивал, къайда ава, тарарал гьар жуьре сортарин ичерин бегьер дигмиш жезва.
- Чи шартIара багъманчивал менфятлу, хъсан къазанжияр гъидай хел я, - лугьузва Къ. Мегьамедова. – Гьавиляй захъ гележегда багъларин майданар артухардай фикир ава.
Замир Мегьамедов