ЦIийи кIелунин йисан сувариз талукь яз 2-сентябрдиз Курхуьруьн 2-нумрадин юкьван мектебдани шадвилин линейка кьиле фена.
Линейка тебрикдин гаф рахуналди, тешкилатчи Г. Шихбабаева ачухна. Гуьгъуьнлай анал директор Алхасов Небиюлагь рахана. Ада сувар мубаракна, гьа са вахтунда алатай кIелунин йисакай, хьайи нетижайрикай, чи адетрикай, вири аялрихъ школьный формаяр хьуникай суьгьбетна. Ада вичин рахунра аялриз дуьз тербия ва дерин чирвилер гунин карда, муаллимрин хьиз, диде-бубайрин виликни акъвазнавай жавабдар везифайрикай лагьана, абуру кIвалах сих алакъада аваз тухун, и месэладиз диде-бубайрин комитетди, агъсакъалрин Советди, полициядин участковый уполномоченныйди ва гьакIни маса общественный тешкилатрини кьетIен фикир гун лазим тирди къейдна. Ахпа яргъал йисара и школада кIвалахзавай, зегьметдин ветеранар тир Ф. Бутаев, и цIарарин автор тебрикдин гафар рахана.
Диде-бубайрин патай Аликъулиева Гуьзелагъа рахана. 7-классдин ученица Велибекова Валяди анал шиирар кIелна.
Эхирдай Х. Шайдаевади (11-кл.) ва Ш. Загьирова (1-кл.) сифтегьан зенг яна.
Муаллимри Дагъустан Россиядин составда аваз 200 ва Расул Гьамзатован 90-йис хьуниз талукьарна ачух тарс тухвана.
Райсудин Набиев, муаллим