ЦIийихуьр. 2-сентябрь. Пакамахъ фад гъилера цуькверин кIунчIар авай, гуьрчегдиз алукIнавай аялар, чинал хъвер алаз, школа галай патахъ ахмиш жезва. Школадин гьаятдал музыкадин ван ала.
Сифте яз школадиз атанвай аялар вилик жергейра аваз, амай аялар школадин вилик квай майдандал дуьз жергейра акъвазарна.
Россиядин Федерациядин Гимн ягъайдалай гуьгъуьниз мектебдин тербиядин рекьяй директордин заместитель Н. Ж. Женетханова шадвилин линейка ачухна. Ада вичин патай аялриз, диде-бубайриз, муаллимриз Чирвилерин югъ мубаракна ва сифте гаф школадин директор Б. А. Ягъибеговаз гана. Тебрикдин хуш келимайрилай гуьгъуьниз ада школадихъ эхиримжи вахтара хьанвай дегишвилерикай, агалкьунрикай, цIийи-вилерикай лагьана ва образованидин цIийи закондикай, адан истемишунрикай ихтилат авуна.
Алатай кIелунин йисан нетижайрикай школадин завуч С. Мирзеханов рахана. Алатай кIелунин йисуз 5 аялди мектеб къизилдин медалралди куьтягьайди, олимпиадайра ва жуьреба-жуьре конкурсра чешнелу чкаяр кьурди, 56-райондин спартакиадада 1-чка кьурди лагьана.
Гаф райондин руководстводин патай векилвал гваз атанвай райондин Агъсакъалрин Советдин председатель Османов Фахрудин-гьажидиз гана. Ада муниципальный райондин Кьил Нариман Шамсудинович Абдулмуталибован ва гьакIни вичин патай сифте яз мектебдиз кам вегьенвай аялриз, муаллимриз Чирвилерин югъ мубаракна, тебрикдин гафар лагьана.
Мярекатдал 1-классдин аялриз и югъ сифтегьан классрин завуч М. Идрисовади мубаракна ва абурухъ еке агалкьунар хьун тIалабна.
Диде-бубайрин патай анал хуш келимаяр гваз сифте яз мектебдиз аял гъанвай Зейналова Раижат рахана.
Мярекатдин сифте кьилелай эхирдал кьван, ара атIуз-атIуз, мектебдин 1,8,10 ва 11-классрин аялри Чирвилерин йикъаз талукьарнавай шиирар кIелна.
Эхирдай вичи лап хъсан къиметар аваз кIелзавай 10-классдин ученица Гьажимурадова Зубейдади ва 1-классдин ученица Мурадханова Мирадади цIийи кIелунин йис башламиш хьунин лишан яз сифтегьан зенг яна.
Эхирдай и цIарарин авторди цIинин Чирвилерин югъ Расул Гьамзатован 90 йисан юбилейдиз ва Дагъустан Россиядик экечIайдалай гуьгъуьниз 200 йис тамам хьуниз талукьарнавайди къейдна.
Н. Женетханов, муаллим