Дагъустан Республикадин Президентдин Указадалди республикадин шегьеррин округрин ва муниципальный районрин самоуправленидин органри кIвалахда къазанмишай агалкьунар ашкъиламишунин мураддалди шегьеррин округриз ва муниципальный районриз республикадин бюджетдай бюджетдин такьатар чара ийиз ва грантар гуз са шумуд йис я.
2012-йисан нетижайркай «Сулейман-Стальский район» муниципальный район дагъдин ценерив гвай зонада 3-чкадиз ва 892 агъзур манат грантдиз лайихлу хьана.
Къазанмишнавай агалкьун мубарак авун ва грантдин Диплом вахкун патал 2-сентябрдиз райондиз Дагъустан Республикадин Президентдин администрациядин Руководителдин заместитель Исмаил Ибрагьимович Эфендиев атана. И месэладихъ галаз алакъалу яз ам администрациядин заседанийрин залда райондин активдихъ галаз гуьруьшмиш хьана. Мярекатда Россиядин Федерациядин Государственный Думадин депутат Мамед Магьарамович Абасова, Дагъустан Республикадин Халкьдин Собранидин депутат Гьамидуллагь Исмаилович Мегьамедова иштиракна.
Актив кIватI хьунин макьсаддикай лугьуналди ва атанвай багьа мугьманар тебрик авуналди, шадвилин мярекат муниципальный райондин Кьил Нариман Шамсудинович Абдулмуталибова ачухна ва кьиле тухвана.
Гаф Дагъустан Республикадин Президентдин администрациядин Руководителдин заместитель Исмаил Ибрагьимович Эфендиеваз гана. Ада къейд авурвал, 2012-йисуз республикадин шегьеррин округрин ва муниципальный районрин кIвалах-дин нетижаяр 11 рекьяй 5 зонада кьуна, гьар са зонада приздин 3 чка гана. Республикадин Президентдин Указдалди приздин чкаяр кьур вири тешкилатриз республикадин бюджетдай 25 миллион манат пул чара авуна. Дагъдин ценерив гвай зонада Сулейман-Стальский район 3-чкадиз ва 892 агъзур манат грантдиз лайихлу хьана.
- За Дагъустан Республикадин Президентдин везифаяр вахтуналди тамамарзавайди тир Рамазан Гьажимурадович Абдулатипован, Гьукуматдин ва кьилди жуван патай 3-чка ва грант райондин Кьил Нариман Шамсудиновичаз, райондин вири агьалийриз мубаракзава, - лагьана И. И. Эфендиева.
Дагъустан Республика вилик тухун патал Рамазан Гьажимурадович Абдулатипова гъиле кьунвай проектрикай, абур уьмуьрдиз кечирмишунин карда райондихъ авай мумкинвилерикай гегьеншдиз суьгьбет авурдалай гуьгъуьниз, Исмаил Ибрагьимович Эфендиева муниципальный райондин Кьил Нариман Шамсудинович Абдулмуталибовав грантдин Диплом вахкана, рикIел аламукьдай савкьват яз махсус знак гана.
Нариман Шамсудинович Абдулмуталибова райондиз еке къимет гунай ва ихтибар авунай Рамазан Гьажимурадович Абдулатиповаз, Гьукуматдиз райондин вири агьалийрин тIвару-нихъай чухсагъул малумарна, республикада 20-далай виниз проектар туькIуьрнавайда-кай, анра райондини иштиракзавайдакай, эхиримжи вахтара районда экономикадин, эцигунрин, здравоохраненидин, культурадин ва маса хилера хъсанвилихъ хьанвай дегишвилерикай, алай вахтунда гъиле авай кIвалахрикай гегьеншдиз лагьана.
- Эхиримжи йисара районда саки вири хилера кьилдин ксарин инвестицияр желбзава, - лагьана Нариман Шамсудинович Абдулмуталибова. – Абурун куьмекдалди районда хъвадай ятар акъуддай «Мевер» завод, Сардархуьре спортдин комплекс эцигна, инвесторди спортдин комплекс КIварчагърин хуьрени эцигзава. Инвесторри эхиримжи са шумуд йисан къене саки 1000 гектарда цIийи уьзуьмлухар ва багълар кутуна. Райондиз инвестицияр желб авунин тереф Рамазан Гьажимурадович Абдулатипова хуьзва. Гьа са вахтунда, районда школаяр, аялрин бахчаяр эцигунин, рекьер туькIуьрунин, промышленностдин карханаяр кIвачел ахкьалдарунин ва маса рекьерай хъувуна кIанзамай кIвалахар гзаф ама. Абурукай республикадин Президент хабардар я, хейлин месэлайрай ада чаз куьмекни хиве кьунва. Алай вахтунда районда инвентаризация кьиле физва. Вилик акъвазнавай кьилин месэлайрикай сад, гьелбетда, налогар вахтунда ва бес кьадар кIватIун я. Налогрилай гзаф крар аслу я.
Вичин рахунрин эхирдай Н. Ш. Абдулмуталибова къейд авурвал, дагъдин ценерив гвай зонада райондин 3-чка кьун – им агалкьун, дамахдай кар я. Гьа са вахтунда, ида райондин руководстводин, гьар са агьалидин вилик мадни хъсандиз кIвалахунин, мадни еке агалкьунар къазанмишиз чалишмиш хьунин везифани эцигзава. И рекьерай мумкинвилер ава, абурукай гележегда менфятни къачуда.
Шадвилин мярекатдал рахай РФ-дин Государственный Думадин депутат Мамед Магьарамович Абасова, ДР-дин Халкьдин Собранидин депутат Гьамидуллагь Исмаилович Мегьамедова, райондин Общественный Советдин председатель Алимет Алиметович Мейланова райондин агьалийриз чIехи агалкьун ва Президентдин грант мубаракна, райондихъ, адан агьалийрихъ мадни чIехи агалкьунар хьана кIанзавайди лагьана.
Хазран Кьасумов
