3-сентябрдиз «Сулейман-Стальский район» муниципальный райондин Кьил Нариман Шамсудинович Абдулмуталибов, РУО-дин начальник Ж. Асланов, райадминистрациядин са жерге жавабдар къуллугърин руководителарни пешекарар галаз цIийи кIелунин йис башламишнавай гьал, кIвалахдин шартIар ахтармишун патал районда сифтегьанбурукай яз (районда 2-юкьван школа) кардик акатай ва чIехибурукай сад тир Шихидхуьруьн юкьван школадиз мугьман хьана.
Абур и хуьруьн поселенидин кьил Набиюллагь Бабаева, школадин директор Раида Айдаевади ва маса муаллимри хушвилелди кьабулна ва школада кIелунинни тербиядин кIвалах эцигнавай гьалдихъ, шартIарихъ, адан тарихдихъ, авай мумкинвилерихъ галаз танишарна.
КIвалахдин шартIарихъ галаз таниш хьайидалай гуьгъуьниз Н. Ш. Абдулмуталибова школадин администрациядихъ, муаллимрихъ галаз совещание тухвана. Анал муаллимри кIвалахдин шартIар хъсанарунин жигьетдай гайи теклифрихъ ва са жерге маса суалрихъ яб акалайдалай гуьгъуьниз чIехи тарих авай, гзаф кьадар алимар, бажарагълу муаллимар акъатай и мектебдиз акакьдай вири жуьредин куьмекар гудайди лагьана, яргъал тегьвена кьилиз акъудиз жедай са бязи месэлайрин гьакъиндай тади серенжемар кьабулун патал хуьруьн поселенидин кьил Н. Бабаеваз ва гьакIни РУО-дин начальник Ж. Аслановаз са бязи тапшуругъар гана.
Н. Шихнабиев