Алай йисан 23-августдиз А. А. Тахо-Годидин тIварунихъ галай педагогикадин илимдинни ахтармишунрин институтдин директор, Дагъустан Республикадин Халкьдин Собранидин депутат Гьамидуллагь Исмаилович Мегьамедов Сулейман-Стальский райондин телевиденидай («КТВ-Касумкент») ачух эфирда рахана, агьалийрин гзаф кьадар суалриз жавабар гана.
Кьве сятдилай виниз давам хьайи вичин рахунра Гьамидуллагь Исмаилович Мегьамедова Дагъустан Республикада арадал атанвай общественно-политический гьаларикай, республикадин Президентдин везифаяр вахтуналди тамамарзавайди тир Рамазан Гьажимурадович Абдулатипован республика вилик тухунин (приоритетный) проектрикай гегьеншдиз суьгьбетна, гуьгъуьнлай райондин агьалийрилай атай гзаф кьадар суалриз тамам жавабар гана.
Лагьана кIанда, гуьзлемишайвал, образованидин месэлайрихъ галаз алакъалу суалрин кьадар иллаки гзаф тир. Мадни, депутатдиз ганвай суалри уьмуьрдин ва яшайишдин саки вири терефар кьунвай: коммунальный къуллугърай къачузвай пуларин кьадар гзаф хьун, яшайишдин кIвалер, социальный инфраструктурадин дараматар эцигун, терроризмдихъ галаз женг чIугун, федеральный ва республикадин тайин мураддихъ элкъуьрнавай программаяр уьмуьрдиз кечирмишун, хатасузвал хуьн, чилер менфятлувилелди ишлемишун ва масабур.
Гь. И. Мегьамедов алай йисан 8-сентябрдиз ДР-дин Президент хкядай сечкийрални гегьеншдиз акъвазна. Ада къейд авурвал, и къуллугъдал хкягъун патал Рамазан Гьажимурадович Абдулатипован кандидатура виридалайни лайихлуди я.
ДР-дин Халкьдин Собранидин депутат, институтдин директор хьиз, халкьдиз зурба дережадин алим, политик, общественный деятель яз чизвай Гьамидуллагь Исмаилович Мегьамедов телевиденидай агьалийрихъ галаз ачух эверда рахунал, суалриз тамам жавабар гунал, са бязи месэлайрай вич талукь къуллугърихъ галаз алакъалу жедайдак инанмишвал къалурунай райондин агьалияр рази яз амукьна.
Х. Гьажибалаев