2013-йисан 5-августдиз «Сулейман-Стальский район» муниципальный райондин депутатрин Собранидин нубатдинди тушир заседание хьана.
Адан кIвалахда муниципальный райондин Кьил, райондин депутатрин Собранидин Председатель Нариман Шамсудинович Абдулмуталибова, райондин администрациядин Кьил Штибег Гьажимегьамедович Мегьамедханова, адан заместителри, администрациядин управленийринни отделрин, гьакIни са жерге къуллугърин руководителри, райондин Собранидин депутатри, хуьрерин поселенийрин кьилери, школайрин директорри, теклифнавай маса юлдашри иштиракна.
Заседание Нариман Шамсудинович Абдулмуталибова ачухна ва кьиле тухвана.
Заседанидал агъадихъ галай месэлайриз килигна:
1. «Сулейман-Стальский район» муниципальный райондин администрациядин къурулуш тестикьарунин гьакъиндай.
2. «Сулейман-Стальский район» муниципальный райондин «Хуьруьн майишатдин ва хаммалдин управление» муниципальный казенный кархана тешкилунин гьакъиндай.
3. Россиядин Федерациядин Федеральный Собранидин Федерациядин Советдин членвилин векилвилер гун патал къалурнавай Умаханов Ильяс Мегьамедсаламовичан кандидатурадин тереф хуьнин гьакъиндай.
Заседанидал алай 1-месэладай финансовый управленидин начальник М. Т. Рагьимова, 2-месэладай правовой управленидин начальник М. М. Исмаилова информацияр авуна.
Депутатри сесер гуналди, и месэлайрай къарарар кьабулна.
Райондин Собранидин депутатри Россиядин Федерациядин Федеральный Собранидин Федерациядин Советдин членвилин векилвилер гун патал къалурнавай Умаханов Ильяс Мегьамедсаламовичан кандидатурадин терефни хвена.
Депутатрин Собранидин заседанидилай гуьгъуьниз райондин администрациядин нубатдин совещаниди вичин кIвалах давамна. Анал чкадин бюджетдиз налогар кIватIунин, инвентаризация тухунин ва важиблу маса месэлайриз килигна.
Совещанидин нетижаяр кьуналди, Нариман Шамсудинович Абдулмуталибова гьялзавай месэлайрин важиблувал къейдна, и рекьерай кIвалахар мадни хъсанардай рекьер къалурна, къуллугърин, кьилдин руководителрин вилик тайин везифаяр эцигна.