Къе гзаф кьадар инсанри тухузвай яшайиш, абурухъ авай кIвал-югъ, техникадин такьатар акурла, акI жезва хьи, дар йисар алатнава, мублагь вахтар алукьнава. Зи рикIизни гьакI хьана кIанзава: кесибвал, дарвал садазни такурай.
Къачун чна Кьасумхуьр, мадни дуьздаказ лагьайтIа, адан куьчейра гьерекатдик квай ва рекьерин къерехар тирвал акъвазарнавай машинар. Абур акурла «инсанрилай машинар бул хьанва» лугьузвайбурни гьахъ яз аквазва заз. Ваъ, за инсанрихъ гзаф машинар хьунал пехилвалзавач. Амма машинар идара ийизвайбуру рекьера гьерекат авунин, абур лазим чкайрал акъвазарунин истемишунрал амал авунни лазим я эхир. Рекьелай элячIзавай инсанар гзаф шоферри квазни кьазвач.
Вун, гьуьрметлу газет кIелзавайди, макъаладихъ галаз ганвай шикилдиз дикъетдивди килиг. Административный пуд мертебадин дараматдинни Культурадин Дворецдин арада авай рекьин кьве падни акъвазарнавай машинрив ацIанва. Абурун арадай агъадалдини, винелдини машинри гьерекатзава. Рекьелай и патай а патаз экъечIун лап четин хьанва.
Мадни, культурадин Дворец авай пата машинар тротуардал гъана акъвазарзава. Машинринни ракьун жагъундин арада саки мензил амач. Тротуар инсанар фин патал эцигнавайди машинрин иесийриз чизвач жал?! Талукь къуллугъри ихьтин татугай гьалдал эхир эцигун лазим я.
Текст кхьейди ва шикил ягъайди Хазран Кьасумов я.