Ингье, гатун кьвед лагьай вацран юкьни хьанва. ЦIийи кIелунин йис башламишизни са акьван вахт амач. Райондин гьар са школа цIийи кIелунин йисаз вахтунда гьазур хьана кIанда, яни школайра герек тир ремонтрин кIвалахар галай-галайвал кьиле тухвана кIанда.
И кар фикирда кьуна, районда чIехи школайрикай сад тир Курхуьруьн М. Рагьимован тIварунихъ галай I-нумрадин юкьван школада цIийи 2013-2014-кIелунин йисан вилик ремонтрин кIвалахрив эгечIнава.
Кьилди къачуртIа, ина полриз ширер янава, сувагъар алатнавай чкаяр сувагъна куьтягьнава, полар, партаяр, столар, стулар ремонтна, абуруз ширер янава, и кIвалах давамни жезва.
- Гьелбетда, РУО-дай атай куьмек авач. Вири и кIвалахар чна хуьруьн поселенидин кьил Гьажалиев Радикан, хуьруьнвийрин куьмекдалди, алатай йисара авай материалар кьенят авуналди тамамарзавайди я, - лугьузва хозяйственный рекьяй школадин директордин заместитель Къ. Бабаева.
Гьар йисуз хуьруьнвийрин патай еке куьмекар жезва. Гаф кватай чкадал абурун тIварар кьун тавуна жедач: Шайдаев Зугьраб, Рустамов Аслан, Шакир ва Разин Рагьимовар, Адилов Казбек, Абдуразакьов Абдуразакь, Сагьидов Агьмедулагь ва икI масабур. Чухсагъул, баркалла чпиз!
Абуру чпи кIелай школа гьич садрани рикIелай ракъурзавач. Чпивай жезвай куьмекар гузва.
Алай йисуз Адилов Казбека 257 агъзур манат пул вичин патай школадиз пишкеш яз ганва. Идахъ школадин руководстводи пластикадин 3I дакIар къачуна, кутазва. И кардал Дербент шегьерда авай пластикадин дакIарар ийизвай цехдин рабочияр машгъул я.
Вири и кIвалахра муаллимар тир Жаватов Эльдара, Исмаилов Балабега, хозяйственный рекьяй школадин директордин заместитель Бабаев Къурбаналиди, уборщицаяр тир Бедалова Умрията, Набиева Наруджади, Аликберова Лизади ва Шайдаева Халумагъади активвилелди иштиракзава. Абуру чпин хиве авай тапшуругъар, везифаяр намуслувилелди кьилиз акъудзава.
- Авай мумкинвилериз килигна, чна кIелунин цIийи йисан вилик ремонтрин кIвалахар вахтунда куьтягьна, аялриз кIелдай къулай шартIар тешкилда. Газетдикай менфят къачуна, заз и кIвалахар кьиле тухунин карда куьмекар гайи ва гузвай спонсорриз, муаллимриз, вири рабочийриз чухсагъул лугьуз кIанзава, - лугьузва школадин директор Шихбабаев Шихбубади.
О. Османов, газетдин жавабдар секретарь.
