- Гатун каникулрин вахтунда школьникри менфятлудаказ ял ягъунихъ, сагъламвал мягькемарунихъ, производстводин бригадайра зегьмет чIугунихъ еке метлеб ава,-лагьана чаз «Сулейман-Стальский район» муниципальный райондин образованидин управленидин начальник Жабраил Асланова.-И кар фикирда кьуналди районда тайин кIвалахни тухузва.
Кьилди къачуртIа, каникулриз ял ягъунинни сагъламвал мягькемарунин лагерриз 490, производстводин бригадайриз 500 аял желбда.
Идалайни гъейри, алай вахтунда Дербент райондин Авадан хуьре кардик квай «Южный» лагердани са шумуд аялди ял язава, чпин сагъламвал мягькемарзава. Санлай абурун кьадар 150-дав агакьда.
Чун Кьасумхуьруьн 1-нумрадин юкьван школада тешкилнавай ял ягъунинни сагъламвилин лагердизни фена. Ана 1-8-классра кIелзавай 35 аял ава.
Лагердин начальник Саимат Селимовади чаз лагьайвал, сифте нубатда лагерда гзаф аялар авай, тIимил таъмин тир хзанрай тир аялри ял язава, сагъламвал мягькемарзава. Школьникрихъ галаз чирвилерин дережа хкаждай, зигьин хъсанардай, машгъулардай мярекатар тухузва, аялрин арада спортдин акъажунар тешкилзава. И кIвалахар тербиячи Эльза Гьажиевади, вожатый Фариза Селимовади аялрин фикир желбдайвал, абуруз итижлу жедайвал тухузва.
Ашпазар тир Галина Наджафовади ва Луиза Мегьамедагъаевади гьазурзавай тIямлу ва чими хуьрекарни школьникри еке иштягьдивди незва.
Лагерда кIвалах тешкилнавай гьалдилай неинки школьникар, гьакI абурун диде-бубаярни рази я.
Шикилда: аялар пакаман зарядкада.
Текст кхьейди ва шикил ягъайди Хазран Кьасумов я.