Михьивал сагъламвилин замин я, лугьузва мисалда. И кар духтуррини тестикьарзава. Гьайиф хьи, михьивал хуьнал вирида амалзава лугьуз жедач. Рекьерни куьчеяр, общественный дараматрин патарив гвай чкаяр зирзибил гадариз чиркинарзавайбуруз михьивал сагъламвилин замин тирди чизвач жал?
Лагьана кIанда, эхиримжи вахтара райондин руководстводи михьивилер авунин кIвалахдиз екез фикир гузва, хуьрера субботникар тешкилзава. Райондин ЖКХ-дин пешекаррини михьивилер авунин рекьяй еке кIвалах тухузва, рекьерин къерехра, куьчейра зирзибил вегьедай контейнерар эцигнава.
Гьайиф хьи, бязи инсанри михьивилер хуьнин къайдайрал, гьава михьиз хуьнал амал ийизвач. Контейнерар эцигнавай чкайрал фейитIа, аквада хьи, анрал зирзибил цIай яна кузва. Анрилай къарагъзавай гумади, ниди патарив гвай кIвалер ацIурзава, гьава чиркинарзава. Пластикадин къапарин, пакетрин ва ихьтин маса шейэрин гум инсанар, иллаки аялар патал лап хаталу я.
Са гафуналди, контейнерра авай, абурун патарив чкIанвай, гьакIни рекьеринни куьчейрин къерехриз гадарнавай зирзибилдиз цIай ягъиз, бязи инсанри экология чIурзава, гьава чиркинарзава.
Фадлай Дагъустан гзаф яшар хьанвай инсанар, гьакIни дагъдин михьи гьава авай чка яз машгьур я. Вучиз чна чи гъилералди чаз тIебиатди ганвай, виридан девлет тир михьи гьава чиркинарун, халкьдин, акьалтзавай несилдин сагъламвал чIурун адетдиз элкъуьрзава?
К.Самедов, Кьасумхуьр.