Жувахъ галаз хъуьруьн-зарафат авай са касдиз за лагьана:«-Дуст кас, зи суалдиз жаваб гайитIа, тIуьн-хъун зи патай жеда».
-Хъсан я, жаваб гуз алахъда зун,-шаклувал кваз заз са геренда килигиз акъвазайдалай гуьгъуьниз, лагьана ада.
-Къенин девирда вал ам хуьруьн куьчейрани, общественный дараматрин патаривни, паркарани, школайрин, аялрин бахчайрин гьаятрани, стадионрални, уьзуьмлухрани, багъларани, сал-бустандани, шегьре рекьерани гьалтда,-лагьана за дустуниз.-Лагь кван, ихтилат квевай физва?
Хияллу хьана зи дуст. Ваъ, жаваб гуз хьанач адавай, гьикьван фикир-фагьум авунатIани.
-Вуна зи рикI акъудмир, зазни интересни я,виринра гьалтзавай ам вуч ятIа яраб?-тажуб хьана, хабар кьуна дустуни.
-Ам, дуст кас, иесивалдай касни галачиз чеб-чпин ихтиярда гьатнавай мал-къара я, -жаваб гана за.
Кьилин ишара авуналди, разивал къалурна дустуни. Гьакъикъатдани, къенин девирда мал-къарадиз, лугьудайвал, девран хьанва. Хуьрера нехирар амач. Лугьузвайвал, гьар са калелай хъсан пул гузватIани, хуьрера кIвалахдик квачирбурун кьадар гзаф ятIани, нехирдив фидай ксар жагъизвач. Хуьрерин тIварар кьадайвал авач, виринра гьакI я.
Алатай саласа юкъуз, ЦIийи хуьряй Кьасумхуьрел къведайла, мал-къара зал сбербанкдин, ЦРБ-дин вилик, «ПМК» участокдай фенвай шегьредал (цIийиз эцигнавай пуд туьквендин вилик), цIийи муькъвел, райцентрадин майдандал гьалтна. Им къайда жеч эхир, гьуьрметлу мал-къарадин иесияр. Квез кал хуьз кIанзава, амма адахъ гелкъвез, ам нехирда хуьз кIанзавач. Гьайванри карханайрин, кьилдин ксарин майишатриз зиянар гузва, рекьерни куьчеяр, общественный чкаяр чиркинарзава. Зарарни чна-чаз гузва, чиркинарни чна чи куьчеяр, кимер, кIвалерин, туьквенрин патарив гвай, чун къекъвезвай, ацукьзавай чкаяр ийизва эхир.
Кьасумхуьрел, ЦIийи хуьре, АгъастIалрин къазмайрал, шегьре рехъ тирвал, зирзибил вегьедай контейнерар эцигнава. Анрални малар кIватI жезва.
Чеб-чпин ихтиярда гьатнавай маларикай вири икрягь хьанва. Абур куьчейра тун чIуру кIвалах тирди, гьарда вичин калин иесивал авун лазим тирди виридаз чизва. Аламат я, бес вучиз и кардин вилик пад кьазвач?
Талукь къуллугъри, хуьрерин поселенийрин кьилери, анрин депутатри маларин иесияр жерме тавун, законрихъ галаз кьазвай (законри истемишзавай) талукь маса серенжемар кьабул тавун мягьтел жедай кар я.
Малариз «девран», абурун вилик инсанар «такьатсуз» хьанвай девир яргъалди давам жеда жал?
Шикилда: малар «ПМК» участокдай фенвай шегьреда.
Текст кхьейди ва шикил ягъайди Хазран Кьасумов я.
