Гад гьарай я, лугьузва бубайрин мисалда. Гьакъикъатдани, гад чуьлдин кIвалахрин къизгъин вахтарикай сад я.
Ингье, алай вахтунда хуьруьн майишатдин карханайра, лежбервилинни фермервилин майишатра, арендадин участокра уьзуьмлухрани багълара, саларани производстводин амай хилера агротехникадин серенжемар, вахтунин кIвалахар кьиле тухузва. Идахъ галаз санал, зегьметчи коллективрин, арендаторар тир кьилдин ксарин вилик гад вахтунда кIватI хъувунин важиблу везифани акъвазнава.
-Алай йисан бегьер патал районда 1638 гектарда къуьл, 266 гектарда мух ва 80 гектарда нехв цанвай,-лугьузва «Сулейман-Стальский район» муниципальный райондин хуьруьн майишатдин управленидин начальник Мегьамедзагьид Бабаева.- Лагьана кIанда, никIера техилдин хъсан бегьер ава. Амма им агалкьун хьанва лагьай чIал туш. Техил вахтунда ва пучвилер авачиз кIватI хъувун лазим тирди чна хъсандиз аннамишзава. Гад агудунал вири къуватар желбнава.
Гьелбетда, районда магьсулдарвал гьи дережада аватIа, гьикьван майданра техилар цанватIа, гьадалай райондин экономика, агьалийрин дуланажагъдин шартIар гзаф аслу я. ИкI, алатай йисуз районда 2150 тонн техил гьасилнай. Магьсулдаррихъ цIи адан кьадар хейлин артухардай фикир ава.
Сир туш, районда магьсулдарвилел хуьруьн майишатдин карханаяр, КФХ-яр бес кьадар машгъул туш. Мисал яз, гуьнепатан хуьрерин агьалияр техилар гьасилунивай саки къакъатнава. Гьавиляй заз, чешне къачун патал, макъалада алай йисан бегьер патал гзаф майданра техилар цанвай карханайрин ва майишатрин тIварар кьаз кIанзава. Абурук «Горец» ООО (240 гектар), «Ашагастальский ЗАО (200 гектар), «Нарим» КФХ (100 гектар), «Простор» СПК (100 гектар), «Зардиян» ООО (90 гектар), «Новый путь» СПК (72 гектар) акатзава.
Карханайрилайни майишатрилай алава яз 2-25 гектаррин майданра техилар цанвай ЛПХ-яр, гъвечIи карханаяр, арендаторарни ава.
Магьсулдарвиликай рахадайла, ихьтин са карни къейд ийиз кIанзава. Икьван чIавалди райондиз тумунин къуьл, асул гьисабдай, республикадилай къецяй (Ставрополдин крайдай ва масанрай) гъизвай. Пешекаррихъ яваш-яваш тумунин къуьл чкадал гьасилдай фикир ава. И мураддалди райондин пуд карханада («Зардиян» ва «Даркуш» ООО-ра, «Кюре» ПО-да) 111 гектарда хъсан еридин (элитный) къуьл цанва. ИкI, «Кюре» ПО-да 33 гектарда «Альфа» сортунин къуьл цанва. Анрай 90 тонндилай тIимил тушиз тумунин техил хьун гуьзлемишзава.
«Даркуш» ООО-да 90 гектардай гад агудна акьалтIарнава. Идакай элитный сортарин тумар цайи 60 гектардай 150 тонндив агакьна техил кIватI хъувуна.
Районда са шумуд карханада, «Арсен» КФХ-да, «Горец» ООО-да, ДаркIушрин, ЦIийи Макьарин, Эминхуьруьн арендаторри чпин кIвачихъ галай никIерай техилар кIватIна акьалтIарнава.
Санлай къачурла, икьван чIавалди районда 1484 гектардай гад агуднава, виликамаз кьунвай гьисабралди, анрин гьар са гектардай 23 центнердив агакьна техил вахчунва. Им шаз кIватI хъувурдалай 9 центнердин гзаф я.
Гад агудай никIерай пресс-подборщик галай тракторри самар туьквера кьазва.
Агъа СтIалрин, Кьасумхуьруьн, Курхуьруьн арендадин участокра, «Асаликентский», «Новый путь» СПК-ра гад агудунин кIвалахар давам жезва.
Хазран Кьасумов
Шикилда: Курхуьрел С.Шайдаеван участокда гад агудзава.
Р. Набиеван шикил
