Гьеле вилик девиррилай инихъ хуьрериз симинин пагьливанар атун шадвилин мярекатдиз элкъвезва. Чеб къадим, хъсан адетар авай лезги халкьди абуруз чIехи гьуьрмет ийида.
Мукьвал йикъара Чуьхверхуьрел, Эминхуьруьз, ЦIийи Макьарал, Сардархуьруьз, Герейханован хуьруьз, АгъастIалрин къазмайрал Мегьарамдхуьруьн райондин Культурадин кIвалин патав кардик квай «Гьунар» тIвар алай симинин пагьливанрин коллектив мугьман хьуни гзаф инсанрин гуьгьуьлар шадарна.
Чун коллективдин художественный руководитель, Дагъустан Республикадин искусствойрин лайихлу деятель, зуьрнечи Алибегов Айдемирахъ галаз гуьруьшмиш хьана. Ада чаз лагьайвал, коллектив 1977-йисуз тешкилна. И йисара ам республикада ва адалай яргъара тухвай фестивалринни конкурсрин иштиракчи хьана, са шумудра анра гъалибвилер къазанмишна. ИкI, пагьливанрин коллектив Испанияда кьиле фейи фестивалдин ва алатай йисуз Цовкра хуьре тухвай симинал къугъвадай пагьливанрин конкурсдин лауреат я.
Коллективдиз алай йисуз Туьркиядиз фидай ва ана яшамиш жезвай чи ватанэгьлийриз чпин гьунарар къалурдай фикир ава.
Лагьана кIанда, хуьрерин агьалийриз симинин пагьливан Шагьбуба Къазиева къалурай нумраяр гзаф бегенмиш хьана. Тамашачийри зуьрнечи Айдемир Алибеговаз, далдамчи Нурдин Алияроваз, «кваса» Шамсудин Абдулазизовазни капар яна.
- Куь райондин агьалияр искусстводин, медениятдин гъавурда авайбур я, - лагьана чаз А.Алибегова.-Хуьрера чун хушвилелди кьабулни авуна. Идай чна хуьрерин агьалийриз чухсагъул лугьузва.
Хазран Кьасумов.