Йисалай-суз райондин къамат дегиш, хуьрер чIехи жезва. Ида райондин, хуьрерин поселенийрин руководителрин вилик аваданламишунин, эцигунрин ва маса рекьерай хейлин везифаярни эцигзава. Лагьана кIанда, и рекьерай авунвай, тухуз гъиле авай кIвалахрин кьадарни гзаф я.
-Райондин са бязи хуьрер, хуьрера эхиримжи йисара арадал атанвай цIийи микрорайонар, куьчеяр газификация авун-им алай вахтунда райондин руководстводи гъиле кьунвай асул кIвалахрикай сад я,-лагьана чаз райондин администрациядин эцигунрин ва ЖКХ-дин управленидин начальник Низами Асланова.-Кьилди къачуртIа, мукьвал тир вахтара Кьасумхуьруьн «Шагь багъ» микрорайон ва цIийиз арадал атанвай маса участокарни куьчеяр газификация ийиз эгечIда. «Шагь багъ» ва маса участокра газдин кьилин линияр тухванва, са шумуд чкадал турбайрал газ инихъ-анихъ чара ийидай тадаракар эцигнава.
Гьелбетда, гъиле кьунвай газификациядин кIвалах герекди, важиблуди я. И рекьерай «Дагестангазсервис» ООО-дин Сулейман-Стальский районда авай «Самурское» ЭГС-дин (эксплуатационная газовая служба) виликни чIехи везифаяр, акъвазнава. Чун анин начальник Фикрет Алиметовахъ галазни гуьруьшмиш хьана, адахъ галаз гьа къуллугъди тухузвай кIвалахрикай суьгьбет авуна.
-Чи ЭГС-ди, санлай къачурла, жуьреба-жуьре диаметрийрин ва давленийрин 400 километрдилай виниз газдин линийриз къуллугъзава,-лугьузва Ф.Алиметова.-Алай йисан алатнавай 6 вацран девирда чна 160-далай виниз газорегуляторный тадаракриз, хуьрерин поселенийра 1380-далай виниз запорный арматурайриз къуллугъна ва ремонтрин кIвалахар тамамарна.
Чаз малум хьайивал, ЭГС-ди 4500 майишатда (кIвалера) ва 80-дав агакьна яшайишдинни коммунальный карханайра къенепатан тадаракриз къуллугъна, ВДГО-дин рекьяй къуллугъ авун патал 9500 абонентдихъ, яшайишдинни коммунальный ва бюджетдин вири карханайрихъ галаз договорар кутIунна. Хуьрерин поселенийра 120 километрда чилел аватнавай, гьакIни агъуз хьанвай газдин линийрик даяхар кутуна, абур хкажна, 80 километрда газдин линийриз шир яна.
Мадни, Кьасумхуьрел, Кьулан СтIалдал, Агъа СтIалдал, Сардархуьре, Герейханован хуьруьн 2-отделенида ГСГО-дин шкафрин 6 пункт эцигна, Агъа СтIалрин къазмайрал ГРП ремонт хъувуна.
Ф.Алиметова чаз лагьайвал, къуллугъдин пешекарри хиве авай везифаяр кьилиз акъудун яз авунвай кIвалахар мадни ава. Амма гьа везифаяр истемишунрихъ галаз кьадайвал кьилиз акъудунин карда манийвилерни гьалтзава.
-Бязи хуьрера газдин линияр тухванвай чилин участокар законсуздаказ инсанри кьунвай, турбаяр накьвадик акатнавай чкаярни ама,-лугьузва Ф.Алиметова.-Санлай ихьтин участокри 10 километр тешкилзава. Ихьтин чIуру кIвалахрин вилик пад кьунайтIа ва инсанри ихьтин законсузвилериз рехъ таганайтIа, чаз кIвалах тухуз регьят жедай.
Чазни алава хъийиз кIанзава: «Самурское» ЭГС-дин начальникди ийизвай наразивал гьахълуди ва бине авайди я. Газдин линияр кIвалерихъ галай чилин участокрик кутун, турбаяр авайвал жугъунар тухун-ибур законрихъ галаз кьан тийизвай, герек авачир крар я. Талукь къуллугъри, хуьрерин поселенийрин кьилери, депутатри ихьтин чIуру крарин вилик пад кьун чарасуз я.
Газдин линияр тухузвай, абуруз къуллугъзавай, агьалийриз къулайвилер яратмишиз алахънавай организацийриз, пешекарриз манийвилер авун ваъ, акси яз, куьмек гун гьар са касдин буржи хьун лазим я.
Хазран Кьасумов
Шикилда: «Шагь багъ» микрорайондиз тухванвай газдин кьилин линия.
Шикил автординди я.