«Сулейман-Стальский район» муниципальный райондин Кьил Нариман Шамсудинович Абдулмуталибова и йикъара ери-бине Эминхуьряй тир, мукьвара Украинадин Харьков шегьерда кэмпо- каратэдай кьиле фейи дуьньядин чемпионатда 85 килограммдин заланвиляй 1-чка кьур Эльмар Гьажимегьамедов кьабулна.
Гуьруьшда райондин администрациядин жавабдар работникри, спортдинни физкультурадин ва жегьилрин крарин рекьяй управленидин начальник Н.Н.Эфендиева, СМИ-дин векилри иштиракна.
Мярекат ачухуналди, Нариман Шамсудинович Абдулмуталибова районда спортдин ва физкультурадин кIвалахдиз екез фикир гузвайди къейдна.
-Райондин спортсменри республикада, уьлкведа ва адалай яргъара тухузвай турниррани чемпионатра къазанмишзавай агалкьунрални чна дамахзава,-лагьана Нариман Шамсудинович Абдулмуталибова. - Ингье, къе чна кэмпо-каратэдай дуьньядин чемпионвилин тIвар къачунвай Эльмар Гьажимегьамедов къаршиламишзава. Чи районэгьлиди къазанмишнавай чIехи агалкьунал чна шадвалзава, дамахзава. За Эльмараз дуьньядин чемпионвилин тIвар райондин администрациядин, Собранидин депутатрин, кьилди жуван ва вири районэгьлийрин патай мубаракзава. Вахъ гележегда, уьмуьрда ва спортдин рекье мадни еке агалкьунар хьурай, гьуьрметлу Эльмар!
Тебрикдин хуш келимайрилай гуьгъуьниз Н.Ш.Абдулмуталибова дуьньядин чемпион Э.Гьажимегьамедоваз Чухсагъулдин чар ва пулдин пишкеш гана.
Вичин спортдин рекьикай куьрелди суьгьбет ийидайла Эльмар Гьажимегьамедова къейд авурвал, ам Эминхуьруьн юкьван школада кIелзавай йисара азаддаказ къуршахар кьунал машгъул хьана. Алай вахтунда ам Санкт-Петербург шегьерда «Ямская слобода» клубда спортдин женгерин са шумуд жуьредал машгъул жезва.
Малум хьайивал, Эльмар Гьажимегьамедов женгинин самбодай ва геплингдай Северо-Западный федеральный округдин чемпион, дзюдодай ва кьуршахар кьунай хейлин турниррин гъалибчини я.
Вич хушвилелди кьабулунай, хуш келимаяр лугьунай кэмпо-каратэдай дуьньядин чемпион Эльмар Гьажимегьамедова муниципальный райондин Кьил Нариман Шамсудинович Абдулмуталибоваз чухсагъул лагьана.