Малум тирвал, 2008-йисалай эгечIна чи уьлкведа гьар йисуз 8-июль хзандин, муьгьуьббатдин ва вафалувилин Югъ яз къейд ийизва. Идахъ галаз алакъалу яз чеб яргъал йисара рикIерни сирер сад авуна, арада михьи муьгьуьббат, гьуьрмет-хатур аваз яшамиш жезвай, гзаф аялар хана, тербияламишна, уьмуьрдин шегьредал акъудай хзанриз махсус медалар гузва.
Алай йисуз «Муьгьуьббатни вафалувал хьунай» гафар кхьенвай медалриз Цмуррин хуьряй тир Хейрудин ва Гуьллер Саидоврин хзан лайихлу хьана. Медаларни абурув, тебрикдин келимаяр лугьуналди, «Сулейман-Стальский район» муниципальный райондин Кьил Нариман Шамсудинович Абдулмуталибова вахкана.
Чун медалриз лайихлу хьанвай хзандихъ галаз гуьруьшмиш хьана.
Малум хьайивал, Хейрудин Саидова сифтедай Дербентдин педучилище ва гуьгъуьнлай Дагъустандин пединститут (заочно) акьалтIарайдалай инихъ, 1971-йисалай башламишна, Цмуррин юкьван школада акьалтзавай несилдиз чирвилер ва тербия гузва. И йисара ада тарсар гайи гзафбурукай чIехи дережайрин руководителар, муаллимар, духтурар, маса пешейрин сагьибар хьанва.
Хейрудинан уьмуьрдин юлдаш Гуьллер, лугьудайвал, халис зегьметчи, кIвалин къул хуьзвай кайвани я. Ада виликдай «Калининский» совхозда, гуьгъуьнлай Каспийск шегьердин «Дагдизель» заводдин Цмурдал алай куьмекчи майишатда саки 40 йисуз намуслувилелди рабочийвиле зегьмет чIугуна. Адан яргъал йисарин гьакъисагъ зегьмет гзаф кьадар грамотаяр, «Зегьметдин ветеран» медаль, «Соцсоревнованида гъалиб хьайиди» знакар гуналди къейднава.
Хейрудин ва Гуьллер Саидоврихъ низамлу, хуьре-кIвале, кIвалахзавай коллективра гьуьрмет авай 5 веледни ава. Расима Казандин юридический, Мегьемедсаида гьа и шегьердин эцигунрин, Гуьлпериди политехнический институтар, Эльмаради Иваново шегьердин педогогический университет акьал-тIарна, чпин пешейрай кIвалах-зава, Анфиса хайи хуьре яшамиш жезва.
- Са тIимил вахт вилик чна санал 40 йисуз яшамиш хьунин «якъутдин мехъерни» къейдна,-лугьузва Гуьллер Садыкьовнади.- Икьван йисара сада-садан кефи хун тавуна яшамиш хьунал хьиз, чна чи ферли веледрални дамахзава.
Гьелбетда, къени, чешнелу хзан гьар са хуьруьн, райондин, обществодин дамах я. Цмуррин хуьруьн жемятдини Саидоврин хзандал дамахзава.
-Хейрудин ва Гуьллер Саидовар хуьруьнвийриз михьи рикI авай, масадан дердиникай хабар кьадай, хуьре тухузвай баркаллу кIвалахрик кьил кутазвай инсанар яз чида, ихьтин ерияр абурун веледризни хас я,-лугьузва «сельсовет Цмурский» хуьруьн поселенидин кьил Раида Алибеговади.-Муьгьуьббатдинни вафалувилин медалар гун мубарак авуналди, чаз Саидоврин хзанда гьуьрмет-хатур, бахт-берекат мадни артух хьана кIанзава.
Текст кхьейди ва шикил ягъайди Хазран Кьасумов я.