ЦIийи хзанар арадал атун, хуьрер чIехи хьун - ибур тIебии крар я . Эхиримжи йисара Кьасумхуьр иллаки чIехи хьанва, цIийи са шумуд микрорайон арадал атанва. Абурукай сад Кьасумхуьрелай СтIалрин «Пуд булахар» галайвал фенвай рекьин кьве падни тирвал арадал атанвай микрорайон я.
И йикъара чун Пожарный частунилай алатайла , чапла пата арадал атанвай са шумуд куьчеда хьана. ТIебиатдин гуьзел и чкада агьалийри чпиз цIийи кIвалер эцигнава, кIвалерихъ галай участокра багълар арадал атанва. Амма ци басмишнавай, лекъвер-фурар акъатнавай , инсанриз къекъведай мумкинвал авачир куьчеяр акурла, чи гуьгьуьл чIур хьана.
- Чи куьчеяр ихьтин чIуру гьалда аваз са вацралай гзаф я, - лугьузва ана чал гьалтай К. Къурбанова. – И кардин себебни микрорайондин кьилихъ галай къаналдик квай 4 лоток хкудун ва абур кухтун тавун я. Абур УОС-дин пешекарри къаналдай яд вичин къайдада авахьна фидайвал кухтада лагьана хкудайди тир. Вучиз ятIани, лотокар кухтун рикIелни алач.
Чна винидихъ лагьайвал, къаналдин яд куьчейра гьатнава. Чаз акурвал, са бязи ксари чпин кIвалерин, усадьбайрин патарив гвай цин хуьлерни ремонтзавач, михьи ийизвач. Идани циз “вичин ихтилатар кьадардилай артухаруниз” куьмекзава.
Белки газетдиз къайдасузвал къалурзавай шикилар акъатайла кьванни ихьтин чIуру кIвалахрин вилик пад кьадай инсанар майдандиз акъатин.
Текст ва шикилар Х. Кьасумованбур я.