Образованидин объектрал цIай кьуникай хуьн таъминарнавай гьалди чак къалабулухвал кутазва.
ЦIай кьунин дуьшуьшра образованидин объектрай аялривай чпивай масадан куьмек галачиз экъечIиз хьун четин кIвалах тирди фикирдиз къачурла, а дараматар цIаяр кьуникай хуьн таъминарун важиблу месэлайрикай сад яз акъваззава. И жигьетдай жавабдарвал а объектрин руководителрин ва приказдалди и жигьетдай тайинарнавай ксарин хиве гьатзава.
Россиядин МЧС-дин ДР-да авай ГУ-дин тапшуругъдалди алай йисан 1-майдилай 10-сентябрдалди «Школа-2013» пожарно-профилактический операция кьиле физва. И вахтунда С-Стальский районда авай НД-дин отделди образованидин управленидин вири объектрал планламишнавай серенжемар кьиле тухуда.
Виликдай рехъ гайи гъалатIар арадай акъудуналди, райондин школайра цIаяр кьуникай хуьнин гьал, кIелзавай аялрин арада профилактикадин кIвалах хъсанарунин жигьетдай серенжемар кьиле тухузва. ЦIийи кIелунин йис алукьдалди дараматрин къаварин (кIарасдин чардахрин) гьал, цIай хкадардай шейэр аватIа, пожарный сигнализация авай гьал ахтармишзава.Школайра цIай кьунин дуьшуьшра анай инсанар акъудунин план кьилиз акъудунин серенжемар тухузва.
Ахтармишунрин вахтунда малум жезвайвал, гзаф кьадар кимивилер йисалай-суз тикрар жезва. Юкьван школайра къецепатай целди таъминарун авач, авай яд хуьдай гьамбарханаярни (водоемы) чIуру гьалда ава. Са объектдани аварийный эквер авач. Электролинийри истемишунриз тамамвилелди жаваб гузвач. ЦIай кьур дуьшуьшра халкьдиз тади хабар гудай къурулушар авач, абурун чкадал школадин зенгер ишлемишзава. ГьакI са жерге маса кимивилерни ама. Гьелбетда, и важиблу месэладив рикI гвачиз эгечIзавайбур жаза таганани амукьзавач. РУО-дин 33 объектдин гьакъиндай анра кIвалах авун акъвазарун патал материалар суддиз рекье тунва. ГьакIни алай йисуз вири тахсиркарар административный жавабдарвилиз чIугвада.
Гьукуматдин пожарный надзордин отделди образованидин объектрал цIаяр кьуникай хуьнин къайдайрал амал авунин жигьетдай мадни кьетIи серенжемар кьабулда.
Р.М.Гьасанбегов, Россиядин МЧС-дин ДР-да авай ГУ-дин С-Стальский районда авай ОНД-дин начальник, къенепатан къуллугъдин лейтенант.