Эдебиятдин кимел цIийи ктаб гваз экъечIун шад жедай кIвалахни я, гьа са вахтунда, ам кIелдайбуру гьикI кьабулдатIа лугьуз рикIик къалабулух кутадай карни я.
За и макъала къелемдин дуст, яргъал вахтара прокуратурадин органра чешнелудаказ къуллугъна, алай вахтунда вич фейи рекьер-хваларикай, пешекарвал кьиле тухудайла таъсир авур вакъиайрикай, художественный документрин бинедаллаз, «Силисчидин запискаяр» тIвар алаз, урус чIалал кхьенвай очеркрин кIватIалдикай я. Адан автор кьве ктаб акъудай ДР-дин лайихлу юрист Ширинов Баламет Заманович я.
КIватIал 14 очеркдикай арадал атанва. Гьатнавай очеркар Баламет Замановича, вич силисчи яз, виликан советрин гьукуматдин йисара кьиле тухвай кIвалахрикай кхьенвайди хьиз, ана чи райондин сергьятра хьайи аламатдин дуьшуьшрикайни са шумуд ава. Гьа кардалди, чеб са кьадар инсанриз ванер атайбур, чир хьайибур ятIани, абур кIелайла, ахьтин фикирдал къвезва хьи, дегьзаманайрилай чи йикъарал къведалди, дуствилин, хуьруьн-вивилин, са районвияр, са миллет, са дагъустанвияр яз стхавилелди яшамиш хьайибур, алай вахтунда, темягькарвили, девлетдихъ къанихвили гьикI чIурувилел гъизватIа къалурзава. Писателди, гьар са очерк кIелайла, фикир ийиз тазва. Им, эсер кхьенвайди ва ам кIелзавайди сад-садан гъавурда гьатун лагьай чIал я.Гьар са автордихъ авай мурадни гьам я.
КIватIалда чка жагъанвай «Стрелочник виноват» очеркда, дугъриданни, ракьун рекьера къуллугъзавай фялейри, идарадин къуллугъчийри тербиядин кIвалахар бушарнавайди, анра хъунриз ва тарашунриз рехъ ганвайди къалуруналди, космический ракетар патал еке къиметар гана гьазурнавай агрегатар, «Не контовать!» гафар кхьенватIани, яб тагана, вагонар сад-садахъ галкIурдай чIавуз, са шумуд миллиондин къимет авай затI чIурун къалурзава. Бес ихьтин кардин нетижа ахтармиш тавурла, силисчиди и чIуру кар вахтунда дуьздал акъуд тавуртIа, миллиардралди къимет авай космический аппаратар къайдадикай хкатунал гъизва.
Са шакни алачиз, цIийи ктаб кIелдайбуру еке хушвилелди кьабулда.
Сажидин, шаир.
