Мукьвара Дербентда, 3-нумрадин типографияда, Чуьхверхуьрелай тир Гуьлмет Ярметован «РикIин хиялар» тIвар алай цIийи ктаб чапдай акъатна.
Лагьана кIанда хьи, 1939-йисуз дидедиз хьайи, яргъал йисара Хив ва чи районрин хуьрера культурадин хиле кIвалах авур Г.Ярметован тIвар медениятдал ва эдебиятдал рикI алайбуруз фадлай таниш я. Шиирар ада гьеле школада кIелзавай йисарилай кхьизва, абур газетриз ва журналриз акъатзава.
2001-йисуз Г. Ярметован «Чуьхверхуьр» тIвар алай сифте ктаб Махачкъалада, Тахо-Годидин тIва-рунихъ галай педагогикадин илимдинни ахтармишунрин институтдин типографияда чапдай акъатнай.
«РикIин хиялар» ктабда 90-дав агакьна Ватандикай, тIебиатдин алемдикай, муьгьуббатдикай ва маса темайрай кхьенвай шиирар гьатнава.
Абур кIелайла малум жезвайвал, Г. Ярметовахъ рикIин хиялар шииррин цIарариз элкъуьрунин рекьяй бажарагъ, эсерар кхьинин кьетIен хатI ава. Абуруз фикиррин деринвал, рифмайрин дуьзгуьнвал, халкьдин яшайишдизни адетриз мукьвавал хас я. Гьавиляй умудлу я, агъсакъал шаирдин цIийи ктаб кIелзавайбуру хушвилелди кьабулда.
ЦIийи ктабдин тираж 200 экземпляр я.
Гьажибала Кьасумов