ЦIийи хуьруьн юкьван школада лезги чIалаз бахшнавай мярекат кьиле фена. Ана муаллимри, 7-11-классра кIелзавай аялри, яратмишдай интеллигенциядин векилри иштиракна. Мярекат дидед чIалан ва литературадин муаллим И. Шидиевади ачухна. Аялри лезги чIалан гуьрчегвиликай, девлетлувиликай, къешенгвиликай лагьана, шиирар кIелна.
Шаир А. Камилова анал эхиримжи вахтара республикада ва районда дидед чIалар хуьниз артух фикир гузвайдакай гегьеншдиз суьгьбетна, вичин литературадин эсерар кIелна. Ада вичин са шумуд ктаб школадиз багъишна.