Манидардин хуш сесинихъ яб акалайла, шаирдин гуьгьуьл ачухдай шиир кIелайла, заргардин гуьзел безекриз килигайла, гам хразвай рушан гьейранардай нехишар акурла инсанри лугьуда: «Аллагьди ганвай пай я». Аллагьди акьалтзавай несилдиз чирвилер гудай ва абур тербияламишдай бажарагъдин пай ганвайбурукай сад Кьасумхуьруьн 2-нумрадин юкьван школада географиядин тарсар гузвай 1-категориядин муаллим Ибрагьимова Гуьлуьшан Ибрагьимовна я лагьайтIа, зун ягъалмиш жедач. Ада вичин дерин чирвилералди, намуслу зегьметдалди, иллаки вири уьмуьрдин кар яз хкянавай муаллимвилин пешедал ашукь хьуналди ва тербияламишунин устадвилелди школадин муаллимрин, аялрин ва абурун диде-бубайрин патай лайихлу гьуьрмет къазанмишнава.
Гуьлуьшан Ибрагьимовнадин пешекарвал къачунин рехъ масад-буралай са куьнални тафаватлу туш: ада лап хъсан къиметар аваз юкьван школа, гуьгъуьнлай Нижный Тагил шегьерда гьукуматдин пединсти-тутдин биологиядин факультет акьалтIарна. 1992-йисалай инихъ Г. Ибрагьимовади Кьасумхуьруьн 2-нумрадин юкьван школада муаллимвиле кIвалахзава. Сифте йикъарилай ада институтда къачур чирвилер практикада ишлемишна ва деринарна, тежрибалу муаллим-ривай тарс гунин, аялрихъ галаз кIвалах тешкилунин тежриба чирна, вири къуватар желбна зегьмет чIугуналди, школадин коллективдин патай ихтибар ва гьуьрмет къазанмишна.
Ингье, Гуьлуьшан Ибрагьимов-нади гьа са школада муаллимвиле кIвалахиз 19 йис я. Ам гьихьтин муаллим я, гьихьтин дережайрив агакьна? И суалдиз виридалайни дуьз жаваб, зи фикирдалди, школадин директор, Дагъустан Республикадин лайихлу муаллим М. В. Велиева гуда.
- Гуьлуьшан Ибрагьимовна чи школада гьакъисагъвилелди кIва-лахзавай, гьар йисуз хъсан нетижаяр къазанмишзавай муал-лимрикай сад я, - лугьузва школа-дин директорди. – Ада къени кIвалах жегьилвилин гьевесдивди давамарзава. Муаллим яз адан чирвилер гунин ва тербиялами-шунин кIвалахдин ери лап кьакьанди я. Ам вичин квалифи-кация, устадвал хкажун патал ара датIана машгъул жезва. Чун Гуьлуьшан Ибрагьимовнадин кIва-лахдилай гзаф рази я.
Г. Ибрагьимова гьар са тарсуниз хъсандиз гьазур хьана къвезва, аялриз ачухзавай цIийи тема къенин уьмуьрдихъ, чун элкъуьрна кьунвай алемдихъ галаз алакъалу ийизва. Намуслу зегьметди, гъавурда аваз тухузвай кIвалахди вичин хъсан нетижани гузва. ИкI, тежрибалу муаллимди чирвилер гузвай аялри райондин ва респуб-ликадин школьникрин олимпи-адайра чпин алакьунар къалурзава. Мисал яз, алай кIелунин йисуз 8-классда кIелзавай Исрафилов Руслана 1- ва 10-классда кIелзавай Къафарова Гуляди райондин школьникрин олимпиадайра геог-рафиядай 2-чкаяр кьуна.
Гуьлуьшан Ибрагьимовна 8 «а» классдин руководителни я. Адан классда авай аялар низамлу ва общественный кIвалахра активни я, абурухъ кIелунин рекьяйни хъсан нетижаяр жезва. Алатай кIелунин йисуз школада тухвай «Вирида-лайни хъсан классдин руково-дитель» конкурсда Г. И. Ибрагьи-мова гъалиб хьун дуьшуьшдин кар туш.
Гуьлуьшан муаллимди «2010-йисан муаллим» тIвар алаз районда тухвай конкурсдани 2-чка кьуна.
Тежрибалу муаллимди школада географиядин хъсан кабинет тадаракламишнава, «Планета» тIвар алаз кружокни тухузва. Ада гьакI аялрин чирвилерин дережа хкажуниз куьмек гузвай вечерар, викторинаяр ва ихьтин маса мярекатар кьиле тухузва, тарихдин метлеб авай ва тIебиатдин гуьзел чкайриз экскурсияр тешкилзава.
Намуслу зегьметдай райондин образованидин управленидин, школадин дирекциядин патай ганвай Гьуьрметдин грамотайрин сагьиб тир Г. Ибрагьимовади гьисабзавайвал, муаллим неинки школада, гьакI кIвале, жемятдин арадани муаллим хьун лазим я.
Чна винидихъ лагьайвал, вичиз тербияламишдай бажарагъдин пай ганвай Гуьлуьшан Ибрагьимов-нади вичин 3 веледдизни хъсан тербия ганва. ИкI, адан чIехи гада Замира Владимир шегьерда юридический университетда 4-курсуна (ам дзюдодай Россиядин спортдин мастер, Россиядин чемпион я), руш Эльвиради ДГУ-дин тарихдин факультетда 3-курсуна, Эскендара школада 5-классда хъсан къиметар аваз кIелзава.
Гуьлуьшан Ибрагьимовадихъ вичин рикI алай кIвалах гележег-дани аферин алаз тамамардай мягькем сагъламвал ва къуватар хьун чи мурад я.
Шикилда: Г. Ибрагьимова
