Герейханован хуьруьн Османов Раидинан тIварунихъ галай юкьван школа районда чешнелубурукай сад я. Школада аялриз хъсан чирвилер гун патал вири жуьредин шартIар яратмишнава. Школада кьудкъадахъ агакьна муаллимри аялриз чирвилер гузва, абурукай чIехи пай кьилин образование авай сад лагьай категориядин муаллимар я.
И йикъара ина цIийи тешкилатчивиле–школадин директордин заместителвиле вичи 1996-йисуз Дагпедуниверситетдин праводинни тарихдин факультет куьтягьнавай Ханвердиев Абдулнасир Ханвердиевичан кандидатура вири коллективди разивал гуналди къалурна.
А. Х. Ханвердиев 1974-йисуз АгъастIал къазмайрал къуллугъчидин хзанда дидедиз хьана. 1991-йисуз хайи хуьре 11-класс, 1996-йисузни Дагпедуниверситетда ГУ-да кIелун куьтягьай ам Кьурагь райондин Ашарин юкьван школадиз ракъурна. Са куьруь вахтундилай Герейханован хуьруьн юкьван школадиз кIвалахал хтана.
Ханвердиев Абдулнасира вичи школада праводинни тарихдин тарсарни гуз, 2005-йисалай школадин край чирдай музей-кабинетдин заведующийвални ийизва. Ам сад лагьай категориядин муаллим, хъсан тербиячи, жегьилрин амадаг я. Хъсан чирвилер ва алакьунар авайвиляй адал и жавабдар къуллугъни ихтибарнава.
Адаз вичин хайи коллективда ва гьакI хуьруьнвийрин арадани еке гьуьрмет ава. Гьинал хьайитIани ада инсанрин къайгъуйрикай, абурун дерди-баладикай хабар кьун, вичивай жедай гьи жуьре хьайитIани куьмек авун вичин кьилин везифайрикай сад яз гьисабзава.
Абдулнасир Ханвердиевахъ хъсан хзан ва 3 аял ава. Абуруни хъсан къиметар аваз кIелзава.