И мукьвара вири, уьлкведа хьиз, чи райондин школайра Виридуьньядин халкьарин дидед чIаларин йикъаз талукьарнавай серенжемар кьиле фена. Анрал обществода тарихдал, халкьарин руьгьдин ирсинал фикир желб авунин кар йикъалай-къуз артух жезвайдакай гзаф рахунар авуна. Идани уьмуьрда чIалан важиблувал аннамишунин месэлаяр арадал гъанва. ЧIал, эдебиятдинни марифатдин ирс, адетар, ацукьун-къарагъун несилрилай несилрал агакьарзавай, гьакIни гьар са халкьдин къакъудиз тежер надир алат хьиз, миллетрин арада алакъа хуьзвай такьатни я.
Муаллимвилин пеше вири девирра обществода гьуьрметлубурукай сад хьайиди я ва гьамиша гьакI амукьни ийида. Къе чаз ЦIийи Макьарин юкьван школада лезги чIаланни литературадин тарсар гузвай кьилин категориядин муаллим Тажибов Мирзефер Селимовича тарсар тухузвай къайдадикай, чи шаиррин эсеррай къачуз, гьар са цIарцIихъ авай манадикай аялар гъавурда тваз, абурук инсан, Ватан, чIал кIан хьунин гьиссер кутазвай тежрибадикай ихтилат ийиз кIанзава.
С. М. Тажибов 1946-йисуз чи райондин Рухунрин хуьре Селиман хзанда дидедиз хьана. Хайи хуьруьн муьжуьд йисан школа акьалтIарна ам Дербентдин педучилищедиз гьахьна. Кьвед лагьай курсуна кIелзавай ам вичин хушуналди армиядин жергейриз фена. Пуд йисуз армиядин жергейра къуллугъ авуна хтайдалай гуьгъуьниз ада кIелун давамарна ва 1970-йисуз педучилище лап хъсан къиметар аваз акьалтIарна. Гьа и йисуз ам ДаркIушкъазмайрин тамам тушир юкьван школадиз урус чIаланни литературадин муаллим яз кIвалахал рекье туна. КIвалахдикай къерех тахьана чирвилерин дережа хкажунин мураддалди 1971-йисуз ам ДГУ-дин филологиядин факультетдиз (РДО) гьахьна.
ЧIалан муаллимар бес тахьун себеб яз, гьа и йисуз ам ЦIийи Макьарин юкьван школадиз лезги чIаланни литературадин муаллим яз кIвалахал хкана.
Лезги чIал ва литература чирунин карда Мирзефер Селимовича вичин тарсара чIал гегьеншардай жуьреба-жуьре таблицаяр, аквадай агитациядин такьатар, дидактический девлетлу материалар, художественный литература истемишзава. Ам гьар са тарсуниз хъсандаказ гьазур жезва, тарс тухунин инновационный технологияр: тарс-путешествие, викторина, лекция, диспут ва масабур ишлемишзава.
М. Тажибов РУО-дин методкабинетда кардик квай лезги чIаланни литературадин методобъединенидин руководитель яз хьана. Ада школада классдилай ва школадилай къеце пата тербиядин чIехи кIвалах тухузва. Мирзефер Селимовича тарсар гузвай аялри гьар йисуз райондин ва республикадин школьникрин арада тухузвай олимпиадайра кIвенкIвечи чкаяр кьазва. Ингье абур: М. Расулова, Д. Абдурагьманова, Э. Расулова, А. Мегьамедова, З. Къурбанова, И. Шахламазова. 2009-йисуз ада тарс гайи 11 «в» классдин ученица Д. Абдурагьманова алакьунар авай жегьилрин тереф хуьнин жигьетдай лауреатвилин премиядиз лайихлу хьана. Хайи край ва адан тарих чирунин макьсаддалди ада вичи тарс гузвай аялар СтIал Сулейманан, Ахцегьрин, Хучнидин музейриз, «Нарын-Кала» къеледиз (Дербент), Самурдин тамуз тухузва, хуьре авай зегьметдин ветеранрихъ, спортсменрихъ галаз гуьруьшмишвилер тешкилзава.
Мирзефер Селимович муаллим-методист я. Адан методический тежрибадикай школайра гегьеншдиз менфят къачузва, адан бинедаллаз бюллетен акъуднава.
Ада вичин тежриба жегьил муаллимриз гузва, абуруз вичи тухузвай тарсариз теклифзава.
М. Тажибова районда ва республикада тухузвай конкурсра иштиракзава. ИкI, «Йисан муаллим-97» лишандик кваз республикада тухвай конкурсда ада «Дидед чIалар» номинациядай 1-чка кьуна, Гьуьрметдин грамота ва къиметлу пишкеш къачуна. 2009-йисуз ам районда ва республикада дидед чIалан ва литературадин тарсар гузвай лап хъсан муаллим яз гьисабна. И кар «Вирироссийский педагогический вестник» газетда къейдна.
Акьалтзавай несилдиз чирвилер ва тербия гунин карда къазанмишзавай агалкьунрай М. Тажибоваз «Просвещенидин отличник», «Старший учитель» тIварар, гзаф кьадар дипломар ва грамотаяр ганва.
Мирзефер Селимовича хуьруьн ва райондин общественный уьмуьрдани активвилелди иштиракзава. ИкI, адакай са шумудра сечкидин комиссиядин член, пуд сеферда агьалийрин перепись тухунин иштиракчи хьана. 2002-йисуз адаз «Вирироссиядин агьалийрин перепись тухуна активвилелди иштиракунай» медаль гана.
М. С. Тажибоваз школада, хуьре-кIвале лайихлу гьуьрметни ава.
Р. Идрисов, ЦIийи Макьарин юкьван школадин завуч,
Н. Мегьамедова, РУО-дин информационно-методический центрдин методист
