Яран сувар. Вичихъ асиррин деринриз фенвай еке тарих авай, вири алемда кьиле физвай дегишвилер лишанламишзавай, чи халкьдин къадимлувиликай лугьузвай и сувар СтIал Сулейманан райондин агьалийри гьар йисуз кьетIен сувар яз къейд ийизва. 21-мартдиз Кьасумхуьруьн В. И. Ленинан тIварунихъ галай майдандал Яран сувариз талукь яз кьиле тухвай шадвилин мярекатди чи райондин агьалийриз суварарни лишанлу йикъар виниз тир дережада аваз тешкилиз, кьиле тухуз чидайди мад сеферда субут хъувуна.
Суварин мярекат йикъан сятдин 2-даз башламишзавайди малумарна-вайтIани, майдандал са шумуд сят амаз, кIеретI-кIеретI хьана, гзаф кьадар инсанар кIватI хьанвай. Жегьилри ва диде-бубайрихъ галаз атанвай аялри иллаки шадвал ийизвай.
Сятдин 2 тамам хьана. Майдандал виликамаз кIватIнавай кIарасрин харадик милли парталар алаз ва гъилера цIай квай шемер аваз атай культурадин Дворецдин патав гвай «Куьре» ансамблдин кьуьлердайбуру цIай кутуна, Яран суварин межлис башламишна. Ам, тебрикдин куьруь гаф рахуналди, райондин аялрин яратмишунрин КIвалин директор М. Милагьимова ачухна ва кьилени тухвана.
Фольклордин дишегьлийрин «Куьре» коллективди халкьдин къанажагъ, адетар, тарих, тIуьн-хъун, Яран суварин мана-метлеб къалурзавай манияр лагьана, сегьнеяр къалурна.
Тебрикдин гаф «Сулейман-Стальский район» муниципальный райондин Кьил Нариман Шамсудинович Абдулмуталибов рахана.
- Гьуьрметлу юлдашар, азиз тир районэгьлияр! – лагьана Нариман Шамсудиновича. – Яран сувар – им Кьиблепатан Дагъустанда къадим ва халкьдин рикI алай суваррикай сад я. И сувар лап куьгьне, инсанри цIуз икрамзавай девиррихъ галаз алакъалу тирдал шак алач. Суварихъ вичиз хас, кьетIен лишанар, адетарни ава. Абуру халкьдин къанажагъда кьетIен чкани кьунва.
Яран сувар тIебиатдал чан къвезвай 21-мартдиз къейд авунихъ мад са кьетIенвал ава, и юкъуз лезгийри виликдай цIийи йисни къейд ийизвай.
Яран сувар – им хзандин, кIаниви-лин, хуш рафтарвилерин суварни я. Къуй ада гьар са кIвализ, гьар са хзандиз берекат, гьуьрмет-хатур гъурай.
Эхирдай за квез виридаз муниципальный райондин администрациядин, депутатрин Собранидин ва кьилди жуван патай Яран сувар мубаракзава. Куьн вири сагърай!
Шад межлисдал Яран суварин гьуьрметдай тухвай спортдин акъажунрин нетижаяр кьуна. «сельсовет Касумкентский» МО-дин кьил Б. К. Бремова путар хкажунай 1-чка кьур В. Меликоваз (Курхуьр) приз яз гьер, яргъаз хкадарунай, гира яргъаз гадарунай ва армспортдай гъалиб хьайи В. Межидоваз (Курхуьр), Р. Гьасановаз, М. Гьажимурадоваз (кьведни ЦIийи Макьар), М. Мурадхановаз (Кьван-цIил) ва Э. Алискероваз (Гъепцегь) пулдин призар гана.
Гуьгъуьнлай гьевескар манидарар тир Э. Кьадиева, Т. Мегьамедова, З. Гьажиева, М. Алиевади, «Мирес» ВИА-ди, кьуьлердайбурун «Куьре» ансамблди, райондин аялрин музыкальный школадин далдамчийрин, чуьнгуьрчийрин дестейри манияр лугьуналди, авазар тамамаруналди, кьуьлер авуналди и межлис мадни гурлу авуна.
Яран суварин межлисдал милли хуьрекар гьазурунай ашпазрин, «Лезгинка» кьуьл тамамарунай ва маса конкурсарни тухвана.
Шадвилер яргъалди давам хьана.
