И йикъара Зеленоград шегьерда дзюдодай Россиядин чемпионат кьиле фена. Ана 60 килограммдин заланвиляй Кьасумхуьруьн самбодинни дзюдодин ДЮСШ-да вердишвилер къачузвай Руслан Аскерова 1-чка кьуна, Россиядин чемпионвилин ва спортдин мастервилин тIварар къачуна.
Тренер, пешекаррин арада дуьньядин чемпион Тельман Къурбанова чаз лагьайвал, и чемпионатда тIвар-ван авай гзаф спортсменри иштиракна. Гьавиляй чIехи яшарин пагьливанрин арада 18 йис хьанвай Р. Аскерова гъалибвал къачун – им чIехи агалкьун я.
И чемпионатда Руслана Орхан Аржанан (Санкт-Петербург), Дамир Зиякован (Челябинск), Арсен Жанарасланован (Краснодар) ва финалдани дуьньядин чемпионатдин призер Рустам Низамутдинован (Башкирия) винел инанмишвилелдди гъалибвал къачуна.
Р. Аскероваз 1-дережадин Диплом, къизилдин медаль, къиметлу пишкешар гана.
Россиядин чемпион гьазурунай гьа ихьтин пишкешриз Тельман Къурбановни лайихлу хьана.
Гила Руслана Голландияда кьиле фидай Европадин чемпионатда иштиракда.
Шикилда: Р. Аскеров (юкьва авайди) гьуьрметдин тахтунал.