Герейханован ДЮСШ-ди Чуьхверхуьрел армрестлингдай филиал ачухна 10 йис я. И йисара Россиядин, Европадин ва дуьньядин чемпион, Россиядин лайихлу тренер Малик Тагьирбегован гъилик вердишвилер къачур са шумуд касдикай тIвар-ван авай спортсменар хьана. Эхиримжи йисара адаз тренервилин кIвалахда вичин ученик, са шумуд сеферда Европадин ва дуьньядин чемпион Рамидин Къазиагьмедовани куьмек гузва.
Тежрибалу тренеррин ученикрин арада къе РФ-дин спортдин мастерар, СНГ-дин, Россиядин, Дагъустан Республикадин чемпионарни призерар ава.
Алай вахтунда М. Тагьирбегован ва Р. Къазиагьмедован гъилик 45 касди армспортдай вердишвилер къачузва ва чпин устадвал хкажзава. Абуру республикада ва адалай яргъара тухузвай турниррани чемпионатра кIвенкIвечи чкаяр кьазва.
ИкI, мукьвара Махачкъалада жаванрин ва чIехи яшарин спортсменрин арада армспортдай Дагъустан Республикадин чемпионат ва республикадин кIвенкIвечивал патал акъажунар кьиле фена. Махачкъаладин, Хасавюртдин, Каспийскдин, Дербентдин, Къизилюртдин, Ахцегьрин ва маса шегьерринни районрин къуватлу командайри иштиракай анра, асул гьисабдай Чуьхверхуьруьн спортсменрикай гьазурнавай чи райондин командади 2-чка кьуна.
Кьилдин спортсменрикай рахайтIа, и чемпионатдани республикадин кIвен-кIвечивал патал акъажунра Тагьирбегов Исабега, Садулаев Жамбулата, Гьажимурадов Малика, Эрзиман ва Къадир Алисултановри, Таривердиев Кьасума 1, Керимов Гьажиди, Алиханов Адилхана, Къарабегов Элдара, Шихмегьамедов Шамила, Шихнабиев Рамила, Мегьамедрагьим ва Якьуб Тагьироври 2, Бабаев Тимура, Айдунбегов Чингиза, Сейдулаев Азиза 3– чкаяр кьуна. Абуруз медалар, РД-дин спортдин ва физический культурадин министерстводин 1-2-3-дережайрин Дипломар ва къиметлу пишкешар гана.
М. Тагьирбегова чаз лагьайвал, и чемпионатдани акъажунра приздин чкаяр кьур жаванри Москвада кьиле фидай Россиядин чемпионатда, яшар хьанвай спортсменрин Кеферпатан Кавказдин федеральный округдин чемпионатда иштиракда.
Гьайиф хьи, Чуьхверхуьрел спортсменриз машгъул жедай кутугай шартIар авач. Абуру тренировкаяр Культурадин кIвалин дараматдин са пипIе тухузва. Кутугай дарамат, шартIар хьанайтIа, са рахунни алачиз, хуьруьн спортсменрихъ мадни хъсан нетижаяр жедай.
Х. Кьасумов
