Эхиримжи вахтара редакциядинни хуьрерин мухбиррин арада авай алакъа сихди хьанва. Идан гьакъиндай редакциядиз чкайрилай къвезвай чарари ачухдиз шагьидвал ийизва. И обзорда чун ихьтин са шумуд чарчел куьрелди акъвазда.
- 1967-йисуз Агъа СтIалдал дидедиз хьайи Рафик Ханбабаева сифтедай Тамбовдин хуьруьн майишатдин техникум, 1994-йисузни К. А. Тимирязеван тIварунихъ галай хуьруьн майишатдин академия акьалтIарна, - кхьизва С. Саидгьасанова. – Педагогикадин илимрин кандидат тир ада алай вахтунда Вирироссиядин хуьруьн майишатдин академияда старший преподаватель, Тимирязеван тIварунихъ галай аграрный университетдин физический факультетдин доцент яз кIвалахзава.
Гьа са вахтунда, самбодай спортдин мастер тир Р. Ханбабаев Москвадин самбодин дишегьлийрин хкянавай командадин кьилин тренерни я. Адан тербиячийри чIехи дережайрин турниррани чемпионатра агалкьунар къазанмишзава.
- И йикъара Кьасумхуьруьн 2-нумрадин юкьван школада алай вахтунда уьлкведин ВУЗ-рани колледжра кIелзавай студентрихъ галаз гуьруьшмиш хьун кьиле фена, - кхьизва и школадин директордин заместитель П. Мегьамедовади. – Санлай къачурла, школадиз 20-далай виниз студентар атанвай. Абуруз школадин завуч Ф. Агъаханова, муаллимар тир С. Селимовади, Д. Бутаевади, И. Къурбановади ва масабуру хуш келимаяр лагьана.
- Курхуьруьн 2-нумрадин юкьван школада кьиле фейи педсоветдин нубатдин заседанидал директордин заместителар тир Э. Абдулазизова ва Гь. Шихбабаева кIелунин йисан алатнавай девирда школадихъ хьанвай нетижайрикай гьахъ-гьисаб авуна, кIелунинни тербиядин кIвалах хъсанарун патал вилик акъвазнавай везифайрикай лагьана, - кхьизва муаллим ва журналист Р. Набиева. – Абуру къейд авурвал, аялар тарсарай агакьуни 92, тарсариз аялар атуни 95 процент тешкилзава.
Редакциядиз къвезвай чарара гзафбуру девирдин татугайвилерикай, чпик секинсузвал кутазвай месэлайрикай кхьизва. ИкI, Вини СтIалдилай тир хуьруьн мухбир З. Мегьамедова кхьизва: «Гьуьрметлу редакция! Эхиримжи вахтара гъуьруьн, гъеридин, дуьгуьдин, гьакIни алукIдай парталрин, бензиндин... къиметар багьа хьуни инсанрин рикIер тIарзава. Идахъ галаз санал, маршрутра авай «Газелар» гвайбуруни инсанар тухунин къиметар хкажзава. Мисал яз, ЦIийи поселокдай АгъастIалрин къазмайрал кьван 20 манат пул къачузва. Виликдай къачузвайди 10 манат тир.
Мадни, 3-4 йис я райондин агьалийрин кIвачихъ газдин идаради бурж я лугьуз 2-4, гьатта 6-10 агъзур манат пулар яна. Мягьтел жезва: ишлемишай газдин пул вахт-вахтунда гузва, квитанцияни гъиле ава. Бес буржар гьинай къвезвайди я? Хабар кьурла, газдин идарадин работникри гузвай жаваб сад я: «компьютердай гьакI акъатзава».
Пенсиядин кьадар 5-6 манат хкажзава лугьуз шейэрин къиметар са шумуд виш манатдин хкажун дуьз туш эхир».
Гьакъикъатдани, мухбирриз газетдин даяхар, куьмекчияр лугьузва. Чна хуьрерин мухбиррилай метлеблу чарар гуьзлемишзава.
Х. Кьасумов
