Ингье, хъуьтIуьн эхиримжи варз тир феврални алукьнава. Алатай декабрдин ва январдин варцари чун чилин берекат тир живералди са артух шадарнач. Чи виридан умудар февралдин вацрак ква. Ам гьихьтинди жеда?
Дагъустандин гидрометеорологиядин ва чун элкъуьрна кьунвай средадин центрдин начальник Поставик Петрди хабар гузвайвал, февралдин варз бул живер гвайди жеда. Гьавадин температура юкьван гьисабдалди кьурла алатай йисарив гекъигайла къана жеда. Гьава умун хьайи йикъара жив фад цIранни ийида.
Юкьван гьисабдалди кьуртIа и вацран гьавадин температура 0-2 градус мекьи жеда. Гьуьлуьн патарив гвай районра ада 0-2 градус чимивал, дагълух районрани 1-3 градус мекьивал жеда. Мекьивилер вацран сифтегьан 10 юкъуз жеда. Гьавадин мекьивили 12-17 градус тешкилда. Кеферпатан дуьзенлух районра 21 градусдихъ агакьна, гьуьлуьн патарив гвай районрани 8-13 градус мекьи жеда.
Вацран эхиримжи декадада (10 юкъуз) гьавадин чимивал артух жеда. Йикъан вахтунда гьавадин температура 9-14 градусдин, са бязи йикъара 20 градусдихъ агакьна чими жеда.
И вацра къвалрин кьадар (ламувал) алатай йисарив гекъигайла нормадилай са тIимил артух жеда.
Хуьруьн майишатдин культураяр хъуьтIяй гатфарал акъатун патал, сад-кьве йикъан къаяр квачиз, и варз къулайди жеда. Чил муркIади кьунивай емиш тарарин ва уьзуьмлухрин дувулрин къурулушдиз зарар гуз жедач.
ВацIара авай цин гьакъиндай лагьайтIа, адан кьадар и вацра алатай йисарив гекъигайла тIимил жеда.
Санлай кьурла, февралдин вацра хъуьтIуь вичикай хабар гуда, чилерик гатфарихъай ламувал хуьн таъминарда, хуьруьн майишат вилик тухун патал къулай шартIар яратмишда.
