Шабатов Шагьабудин 1951-йисан 4-февралдиз Сулейман-Стальский райондин Агъа Макьарин хуьре дидедиз хьана. Ада хуьруьн майишатдин инсти¬тут куьтягьна. Гзаф йисара «Зардиян» совхозда инженервиле кIвалахна. Алай вахтунда ада «Лезги газетдин» хсуси корреспондент яз кIвалахзава.
Ш. Шабатова жегьил вахтарилай муьгьуь-ббатдикай, тIебиатдикай, ватандикай ва алай девирдин татугайвилерикай шиирар кхьизва.
Адан къелемдикай гьам лезги ва гьамни урус чIаларалди шииррин ва прозадин са шумуд ктаб хкатнава. Ам «Ша хъуьрен», «Къуьлуьн кьилер», «Кьурагь райондин 70 йис» уртах, «Илиф Макьаз», «Эй, дуьнья», «Девирдин лишанар», «ТIалар-квалар» ва «Дети аула» ктабрин автор я.
Алай вахтунда Дагъустандин гьукуматдин ктабрин издательствода чапдай акъудиз Шагьабудин Шабатован 15 печатдин листерикай ибарат тир шииррини прозадин «Экв це дуьньядиз» ва урус чIалалди кхьенвай шииррин «И я хочу оставить след» ктабар ава.
Ш. Шабатов РФ-дин писателрин ва журналистрин союзрин, ЛПС-дин член, «Куьредин ярар» медениятдин макандин комитетдин член, ДР-дин культурадин лайихлу работник я.
«Куьредин хабарар» газетдин редакциядин коллективди чи газетдин амадаг, са къелемдин стха, бажарагълу шаир, журналист ва хъсан общественник Шагьабудин Нурдиновичаз вичин 60 йисан юбилей рикIин сидкьидай мубаракзава ва адахъ чандин мягькем сагъвал, хзанда бахт, берекат, вичин хивевай журналиствилин жавабдар кIвалахда, яратмишунрин рекье мадни еке агалкьунар хьана кIанзава. Агъадихъ чна адан са шумуд шиир гузва.