Малум тирвал, эхиримжи йисара чи уьлкведа физкультура ва спорт вилик тухунин, акьалтзавай жегьил несил сагъламди хьунин месэладиз кьетIен фикир гузва. Гьар садан сагъламвал миллетдин сагъламвал я лугьудайвал, чи гележег тир жегьилрин гьакъиндай месэладиз алатай йисан 15-декабрдиз кьиле фейи Дагъустандин халкьарин 3-Съезддални кьетIен фикир гана. Анал къейд авурвал, чи жегьилар террориствилинни экстремиствилин гьерекатрин таъсирдик акат тавун патал бейкарвал арадай акъудунихъ, цIийи кIвалахдай чкаяр тешкилунихъ галаз сад хьиз, физкультура ва спорт вилик тухунихъ, талукь шартIар яратмишунихъ, абур ватанпересвилин руьгьдаллаз тербияламишунихъ еке метлеб ава.
И жигьетдай районда кIвалах тешкилнавай гьалдикай, алатай йисан нетижайрикай ва алай йисуз вилик акъвазнавай везифайрикай суьгьбет авун чна физкультурадинни спортдин ва жегьилрин крарин рекьяй райондин управленидин начальникдин заместитель Гьажалиев Руслан Шихмегьамедовичавай тIалабна.
Агъадихъ чна адан суьгьбет гузва.
- Гьакъикъатдани жегьилрихъ галаз кIвалах тухуниз, чи уьлкведа ва республикада хьиз, чи райондани эхиримжи йисара къвердавай артух фикир гузва. И жигьетдай абур физкультурадални спортдал желб авунихъ еке метлеб ава. Ватандашрин сагъламвал уьлкведин виридалайни чIехи хазина, девлет я лагьайвал, 60600 кас агьалияр яшамиш жезвай чи райондани физкультурадални спортдал машгъул жезвай, сагълам уьмуьр хкязавайбурун кьадар йисалай-суз артух жезва. И жигьетдай чи управленидини тешкиллувилин еке кIвалах тухузва. Чна чи кIвалах виликамаз гьазурнавай ва райондин руководстводи тестикьарнавай пландин бинедаллаз кьиле тухузва. Ида вичин хъсан нетижаярни гузва.
Алай вахтунда районда физкультурадинни спортдин рекьяй чирвилер гунал физический культурадин 55 коллектив, гьа гьисабдай яз умуми образованидин 41, школадиз фидай яшар тахьанвайбурун 11 ва алава чирвилер гунин 3 идара машгъул я. Умуми образованидин школайра физкультурадин тарсар гунал 58 муаллим машгъул я, абурукайни 42 дахъ кьилин, 16 дахъни юкьван махсус образование ава.
Районда спортдин гьар жуьрейрай 14 секция кардик ква. Секцийра ва спортдин школайра 3697 кас машгъул я. Абуруз 105 кас тренерри вердишвилер гузва. Абурукайни 46 дахъ кьилин образование, вадахъни юкьван махсус образование ава.
Районда спортдин жуьреба-жуьре хилерин 98 спортдин дараматар кардик ква.
Чахъ 32 спортзал, 66 жуьреба-жуьре тадаракар, футбол къугъвадай 23, волейболдин 30 ва баскетболдин 13 майдан ава.
Спортдин дараматрин умуми майданрин кьадарди 94830 квадратдин метр тешкилзава. Гьар са касдал 1,7 квадратдин метр гьалтзава. Гьа са вахтунда вири спортдин идарайра санлай 2206 касдиз спортдал машгъул жедай мумкинвал ава.
2010-йисуз районда 610 кас спортсменар-разрядникар гьазурнава, гьа гьисабдай яз 12 кас спортдин мастервиле кандидатар (КМС) ва 8 касни 1-разряддин спортсменар.
Районда 4 ДЮСШ кардик ква. А школайра спортдал 3050 кас машгъул жезва, абурукайни 79 рушар я.
Физкультурадин тарсара 8346 аялди иштиракзава.
ДЮСШ-рин группайра тарсар анрин спортивный базайра, и кар патал туькIуьрнавай махсус чкайра, умуми образованидин школайра кьиле тухузва.
2010-йисуз жуьреба-жуьре соревнованияр кьиле тухун патал райондин бюджетдай 497700 манат пул чара авуна.
Гьа са вахтунда райондин гзаф хуьрера типовой спортзалар эцигна кIанзава, бязибур ремонт авунин, анрин материально-технический база мягькемарунин чарасузвал ава.
Райондин администрацияди ва чи комитетди 2010-йисуз кьилин фикир чкайрал спортивно-массовый, учебно-тренировочный ва тербиядин кIвалахдин ери хъсанарунин, виниз тир разрядрин спорсменар гьазурунин кIвалахдин менфятлувал хкажуниз гана.
ЦIийи кIелунин йис башламиш хьайила Эминхуьре азаддиз кьуршахар кьунин рекьяй цIийи ДЮСШ ачухна. Курхуьрел (24м х 12м) цIийи спортзал эцигна куьтягьнава.
Массовый спорт вилик тухунин месэлайриз мукьвал-мукьвал райадминистрациядин, чи управленидин заседанийрал, физкультурадин муаллимрин методобъединенийрал килигиз хьана.
Чи райондин спортсменрихъ армспортдай, дзюдодай, боксдай, азаддиз кьуршахар кьунай ва спортдин маса жуьрейрай республикадин, Вирироссиядин соревнованийра хъсан нетижаяр хьана. ИкI, 2010-йисуз армспортдай ДР-дин кIвенкIвечивал патал кьиле фейи акъажунра чи райондин командади (чIехибурун ва жаванрин арада) умуми командный 2-чка кьуна. Дагъустандин кIвенкIвечивал патал боксдай кьиле фейи акъажунра тренер А. Межидован ученикар тир Ферзалиев Тамерлана (52кг.) ва Гьамидуллаев Роберта (66кг.) 2-чкаяр кьуна. Боксдай Астраханда кьиле фейи Вирироссиядин турнирда Ферзалиев Тамерлана (52 кг.) 1-чка кьуна.
ДР-дин кIвенкIвечивал патал дзюдодай кьиле фейи акъажунра Керимов Муслима 1-чка кьуна, адакай гьакI самбодай ДР-дин чемпион хьана, самбодай Имам Шамил рикIел хкунин Международный турнирдани 1-чка кьуна.
Боксдай 1995-1996-йисара дидедиз хьайи жаванрин арада ДР-дин чемпионатда Р. Гьабибулаева 2-чка кьуна.
ДР-дин кIвенкIвечивал патал самбодай ва дзюдодай кьиле фейи акъажунра Алискеров Икрама 1 ва 2 чкаяр кьуна. Ам гьакI М. Гусаев рикIел хкуниз талукьарна дзюдодай тухвай республиканский турнирдин 2-призерни хьана.
Чи райондин спортсменри «Зарница» военно-спортивный къугъунрин рекьяй Республиканский акъажунра 3-чка кьуна. Армиядиз эвер таганвай жаванрин арада ДР-дин спартакиададин акъажунра чи райондин командади 1-чка кьуна.
Массовый спортдихъ галаз алакъалу вири соревнованияр, чи чIехи гъалибвилер гваз хтай спортсменрихъ галаз райондин Кьил гуьруьшмиш хьунар чкадин телевиденидай гана ва абурукай «Куьредин хабарар» газетда чап авуна.
Санлай кьурла, 2010-йисуз райондин бюджетдай спортивно-массовый серенжемар кьиле тухуниз зур миллиондихъ агакьна пул чара авуна.
Чи спортсменри районда ва адалай къеце кьиле физвай гзаф маса мярекатрани активвилелди иштиракзава.
Дагъустандин халкьарин 3-Съезддин къараррихъ галаз кьадайвал, муниципальный райондин регьбервилик кваз ва куьмек галаз, гьакIни вири организацийрихъ, идарайрихъ сих алакъада аваз, чи управлениди гележегдани райондин агьалийрин арада тухузвай физкультурно-оздоровительный ва спортивно-массовый кIвалах мадни вилик тухунал вири къуватар желб ийида.
Суьгьбет кхьейди Абидин Камилов я.
