Эхиримжи вахтара «Куьредин хабарар» газетдинни хуьрерин мухбиррин арада авай алакъа лап мукьва ва сихди хьунал кьве терефдини разивал ийизва. Эхиримжи 20-25 йисан къене сифте яз алатай йисуз редакциядин работникринни хуьрерин мухбиррин совещание кьиле тухуни и кардин патахъай ачухдиз шагьидвал ийизва.
Алатай гьафтеда, 28-январдиз, хуьрерин мухбиррин иштираквални аваз редакцияда кьиле тухвай совещанидал газетдин редакцияди алатай йисуз авур кIвалахдин нетижаяр кьуна, алай йис патал везифаяр тайинарна.
Газетдин редактор Анварбег Асланбегович Миметова совещанидал вичин рахунра къейд авурвал, райондин печатдин орган тир «Куьредин хабарар» газет 1931-йисалай акъатзава. И девирда, районэгьлийрин хабардар, меслятчи, руьгьдин ем тир газет баркаллу рехъ фена, вири и йисара ада халкьдихъ галаз, адан шадвилерикни пашманвилерик шерик яз, виликди камар къачуна, и кар давамни ийизва. Къе газет 25756-нумрадик кваз акъатнава. Алатай йисни редакцияди тайин нетижаяр аваз акьалтIарна: чинриз акъатзавай материалар мана-метлебдиз деринбур, фикир желбдайбур хьунилай гъейри, пландилай алава яз газетдин 3 нумра артух акъудна. Идак, гьелбетда, газетдин даяхар тир хуьрерин мухбиррин ва кIелзавайбурун зегьметдин еке пай ква. Шаз мухбиррилай ва кIелзавайбурулай 100-дав агакьна чарар атана, абурукай 92 газетдин чинриз акъудна.
Гьелбетда, газетдин кIвалахда нукьсанар, хъувуна кIанзавай кIвалахарни амачиз туш. Абурукай редакторди ачухдиз лагьана.
А. А. Миметова редакциядин кIвалахдикай, газетдихъ хьанвай нетижайрикай лугьунихъ, активный мухбиррин тIварар кьунихъ галаз санал, газет кIелзавайбурун руьгьдин игьтияжар тамамвилелди таъми-нарзавайди хьун патал гьам редак-циядин работникрин, гьам хуьрерин мухбиррин вилик акъвазнавай везифайрикайни гегьеншдиз лагьана. ИкI, газетда райондин общественно-политический уьмуьр, ана кьиле физвай вакъиаяр тамамвилелди къалурун лазим я. Газетда критикадин, экстремизмдизни терроризмдиз акси, тербиядин месэлайрай кхьенвай материалар тIимил жезва. Алатай йисан 15-декабрдиз кьиле фейи Дагъустандин халкьарин 3-Съезддални и месэ-лайрин важиблувал къейд авунай. Абурувай газетни яргъа хьана кIандач.
Идалайни гъейри, редакторди къейд авурвал, алай йисуз газетдин 80 йис тамам жезва. Юбилей лайих-лудаказ къаршиламишуник редак-циядин работникри хьиз, хуьрерин мухбирри ва газет кIелзавай гьар са касди лайихлу пай кутун лазим я.
Совещанидал хуьрерин мухбирри чпин фикирарни лагьана. Ингье куьрелди са шумудан фикирар:
С. Саидгьасанов: - Газет патал хьиз, мухбир яз зун патални алай йис кьетIенди я. Газетдин 80 йис жезва, адахъ галаз за алакъа хуьз – 65 йис. Зун газетдилай, чпихъ кьетIен хатI, бажарагъ авай адан работникрилай гзаф рази я.
Мухбиррин совещанияр тухунив эгечI хъувунин терефни за хуьзва. Им гьам газет, гьам адахъ галаз алакъа хуьзвай мухбирар патал менфятлу я.
Р. Набиев: - Редакторди вичин рахунра къейд авурвал, эхиримжи йисара газетдин кIвалах, адан чинриз акъатзавай материалрин ери хейлин хъсан хьанва. ЦIи газетдин 80 йис тамам жезва. Ида вилик газет мадни хъсанарунин, цIийи рубрикаяр ачухунин везифаяр эцигзава. И кардик чнани, хуьрерин мухбиррини, пай кутада.
Редакциядиз ракъурай материалар газетдин чинриз акъат тавурла, мухбирар бейкеф жезвай вахтарни ава. И кардизни фикир гана кIанда.
Л. Исаева: - За райондин газетдихъ галаз 1965-йисалай инихъ алакъа хуьзва. Гьар сеферда газетдин чинилай жуван макъала акурла, заз гзаф шад жезва. Шаз «Муаллимрин йис» конкурсда зи очеркдиз 3-чка гуни зи ашкъи-гьевес мадни артухарна.
Эхиримжи вахтара райондин газет райондин трибунадиз элкъвенва. Гьавиляй за кIвалахзавай Вини СтIалрин врачебный амбулаторияда авай 17 работникдини «Куьредин хабарар» газет кхьенва, кIелзава.
Ш. Шабатов: - 1964-йисуз 5-классда кIелзавай зи шиир сифте яз райондин газетдиз акъатнай. Гьа йикъалай инихъ зун газетдин мухбир я.
Жуван кьвед лагьай кIвал хьанвай редакциядин дарамат капитальнидаказ ремонт авунал, адан работникриз – жуван къелемдин стхайризни вахариз кIвалахдай къулай шартIар ярат-мишунал, газет хъсан хьунални за шадвал ийизва.
В. Жамалдинов: - Редакциядин, газетдин кIвалахда хъсанвилихъ еке дегишвилер хьанвайди зазни къейд ийиз кIанзава. Мухбирриз гонорар гунни хъсан кар хьанва. Зегьметдиз къимет гун лазим я. Гьа са вахтунда, газетда къецепатан уьлквейра кьиле физвай вакъиайрикай материалар лап тIимил жезва. Литературадин эсер-ризни тIимил чка гузва.
Газетдикай совещанидал чпин фикирар З. Наврузова, З. Мегьамедова, Н. Юркъулиевади, М. Мегьамедова, Ж. Мегьамедовади ва масабуруни лагьана, теклифар гана.
Совещанидин эхирдай А. А. Миметова газетдихъ галаз алакъа хуьзвай мухбирриз «Куьредин хабарар» газетдин редакциядин патай Гьуьр-метдин грамотаяр, пулдин премияр, къиметлу пишкешар гана.
