И йикъара райадминистрациядин заседанийрин залда муниципальный райондин Кьилин патав гвай райондин агъсакъалрин Советдин нубатдин заседание хьана. Аниз и Советдин членрилай гъейри хуьрерин муниципальный поселенийрин кьилеризни агъсакъалрин Советрин председателриз, райондин хуьрерин имамрин Советдин членриз, СМИ-рин ва са жерге маса общественный организацийрин векилриз теклифнавай.
Заседанидин кIвалахда муници-пальный райондин администрациядин Кьилин везифаяр тамамарзавайди тир Агьмедов Мусаиб Гьажибалаевича ва ДР-дин Президентдин патав гвай Агъсакъалрин Советдин патай векил яз анин член Латифова Зара Агьмадовнади иштиракна.
Заседанидал райондин агъса-къалрин Советдин председатель Асланов Халилбег Османовича агъсакъалрин Советди 2010-йисуз тухвай кIвалахдикай ва Дагъустандин халкьарин 3-Съезддин къараррихъ галаз кьадайвал 2011-йисуз вилик акъвазнавай везифайрикай гьахъ-гьисабдин доклад авуна.
Ада къейд авурвал, райондин агъсакъалрин Советди вичин кIвалах виликамаз туькIуьрнавай ва райондин руководстводи тестикьарнавай махсус пландин бинедаллаз кьиле тухузва. Планда тайинарнавайвал, Советдин, адан Президиумдин заседанийрал райондин экономика вилик тухунин, социальный, культурадин, бейкарвал арадай акъудунин, цIийи кIвалахдай чкаяр тешкилунин, акьалтзавай несил ватанпересвилин, чи бубайрин адетриз вафалубур яз тербияламишунин месэлайриз килигна, талукь къарарар кьабулна.
Чна чи кIвалах райондин руково-дстводихъ, хуьрерин поселенийрин кьилерихъ, агъсакъалрин Советрихъ ва маса общественный организацийрихъ галаз сих алакъада аваз кьиле тухузва, - давамарна ада. – Чна чи кIвалахда акьалтзавай несил ватанпересвилин ва интернациональный руьгьдаллаз, чи бубайрин адетриз, баркаллу крариз вафалубур яз тербияламишунин, агьалийрин законлу ихтиярар хуьн таъминарунин месэлайриз гузва.
Гьа са вахтунда ам и Советдин кIвалахда амай кимивилерал, Дагъус-тандин халкьарин 3-Съезддин исте-мишунрихъ галаз кьадайвал и жигьет-дай чи вилик квай са жерге важиблу месэлайрални гегьеншдаказ акъвазна.
Гуьгъуьнлай анал и месэлайрай авай бязи кимивилерин гьакъиндай, чпин фикирар ва къиметлу теклифар гваз райондин имамдин заместитель Османов Фахрудин-гьажи, райондин агъсакъалрин Советдин член, шаир Сажидин Саидгьасанов, агъсакъал Абумуслимов Ярагьмед, райондин имам Рамазан-гьажи, Герейханован хуьруьн агъсакъалрин Советдин председатель Жамалдинов Вадим, эминхуьруьнви агъсакъал Рустамов Аслан, дяведин ва зегьметдин ветеранрин райондин Советдин председатель Гьасанов Мегьа-медгьуьсейн, КIахцугърин хуьряй тир агъсакъал Исрафилов Багьаудин, ЦIийи Макьарилай тир Къазиев Гьашим, Шихидхуьруьн агъсакъалрин Советдин председатель Алипулатов Иса, кIахцугъви динэгьли Ражабов Медет рахана.
Гуьгъуьнлай анал экъечIна рахай ДР-дин Президентдин патав гвай агъсакъалрин Советдин патай атанвай векил тир анин член Латифова Зара Агьмадовна Дагъустандин халкьарин 3-Съезддал къарагъарай важиблу месэлайрал гегьеншдаказ акъвазна, терроризмдихъ ва экстремизмдихъ, коррупциядихъ галаз женг чIугунихъ галаз санал, ада бейкарвал арадай акъудунин, акьалтзавай несил ватан-пересвилин руьгьдаллаз, чи бубайрин баркаллу крариз вафалубур яз тербияламишунин жигьетдай сифте нубатда чи агъсакъалрин, вири общественностдин вилик акъвазнавай месэлайрикай гегьеншдиз лагьана, бязи теклифар гана, меслятар къалурна.
Заседанидин эхирдай анал рахай М. Гь. Агьмедова Дагъустандин хал-кьарин 3-Съездди чи вилик эцигнавай важиблу месэлайрикай, и жигьетдай чахъ авай мумкинвилерикай ва кьабулзавай серенжемрикай лугьунихъ галаз санал, заседанидал рахай юлдашри къарагъарай месэлайрай авай кимивилерин жигьетдай вичин фикирар лагьана, талукь делилар гъана, меслятар къалурна.
Заседанидин эхирдай анал гьялай месэладай талукь къарар кьабулна. Гьахъ-гьисабдин девирда райондин агъсакъалрин Советди тухвай кIвалахдиз рази жедай къимет гана.
