31-январдиз райадминистрациядин нубатдин заседание кьиле фена. Аниз райадминистрациядин управленийрин, отделрин начальникрилай гъейри хуьрерин поселенийрин кьилериз, хуьрерин школайрин директорриз, тешкилатчийриз, акьалтзавай несилдиз военно-патриотический тербия гунихъ галаз алакъалу тир маса къуллугърин руководителриз, общественный организацийрин векилриз теклифнавай.
Заседание «Сулейман-Стальский район» муниципальный райондин Кьил Абдулмуталибов Нариман Шамсудиновича ачухна ва кьиле тухвана.
Анал районда акьалтзавай жегьил несилдиз военно-патриотический тербия гунин кIвалах авай гьалдикай ва и жигьетдай кьабулзавай серенжемрин гьакъиндай месэладиз килигна.
Заседанидал гьялзавай месэладив эгечIдалди, Н. Ш. Абдулмуталибован теклифдалди, адан иштиракчийри са декьикьада къарагъна кIвачел акъвазуналди, Москвада и мукьвара «Домодедово» аэропортуна террористри авур инсафсуз терактдин къурбандар хьайибур рикIел хкана.
Заседанидал алай месэладай, «Школьникриз ва аялриз военно-патриотический тербия гунин жигьетдай тухузвай кIвалах авай гьалдин ва кьабулзавай серенжемрин гьакъиндай» анал райадминистрациядин кьилин заместитель С. М. Велиева гегьенш доклад авуна.
И жигьетдай, санлай кьурла, чи районда кIвалах эцигнавай гьалдал, адан нетижайрал, кьабулзавай серенжемрал гегьеншдаказ акъвазунихъ галаз санал, ада авай кимивилерикай, гьялна кIанзавай месэлайрикайни лагьана.
И месэладай анал алава доклад РУО-дин начальник Ж. А. Асланова авуна. Адани вичин рахунра чи школьникри районда ва адалай къеце кьиле тухузвай спартакиадайра, военно-спортивный къугъунра ва жуьреба-жуьре маса акъажунра лайихлу чкаяр кьазвайди къейд авунихъ галаз санал, и жигьетдай гзаф мектебрин материально-технический база зайиф тирди, райондилай къеце кьиле тухузвай акъажунриз фидайла пулунин такьатрикай четинвал жезвайди къейдна. Гьа са вахтунда ада райондин руководство и месэладай школайра, образованидин маса идарайра кIвалахда куьруь са вахтунда аквадай дегишвал твадайдахъ кIевелай инанмишарна.
Заседанидал гьялзавай месэладай анал чпи тухузвай кIвалахдикай, кьабулзавай серенжемрикай ва вилик акъвазнавай месэлайрикай куьруь информацияр ва теклифар гваз физкультурадинни спортдин ва жегьилрин крарин рекьяй райондин управленидин начальникдин заместитель Р. Ш. Гьажалиев, Кьулан СтIалрин СОШ-дин директор А. Ш. Абдусамедов, культурадин ва информациядин управленидин начальник М. Б. Бабаханов ва маса юлдашар рахана.
Эхирдай анал рахай муниципальный райондин Кьил Н. Ш. Абдулмуталибова заседанидал гьялзавай месэладай районда авай гьалдиз къимет гана, и жигьетдай гележегда кIвалах хъсанарунихъ рекье тунвай са жерге къиметлу теклифар гана ва меслятар къалурна, и важиблу месэла вири чкайра гьар йикъан гуьзчивилик хьун, гьар сада чи миллетдин гележегдин патахъай вичин жавабдарвал хкажун чарасуз тирди къейдна.
Ада гьакI эхирдай анал талукь къуллугърин руководителривай муаллимриз мажибрин пул гунин жигьетдай ва гьакIни вацIун кьеряй Кьасумхуьруьн куьгьне муькъвяй цIийи муькъвел кьван автомашинар фидай рехъ туькIуьрунин кIвалахар авай гьалдикай хабарар кьуна, кIвалахда куьруь са вахтунда аквадай дегишвал тун истемишна.
Заседанидал гьялай месэладай анал талукь къарар кьабулна.
Гьа иналди райадминистрациядин нубатдин заседаниди вичин кIвалах акьалтIарна.
