Россиядин Федерациядин законар вири къурулушриз, вири гражданриз талукь я, гьавиляй абурал амал авун виридан буржини я. Гьайиф хьи, гьакъикъатда икI я лугьуз жедач. Законсуздаказ, талукь къуллугъри ихтияр таганваз чилин участокар, рекьерин къерехар кьун, анрал дараматар эцигун – ибур гьи къанунрихъ галаз кьазвай крар я?
2010-йисан 6-декабрдиз 82-нумрадик кваз райондин муниципальный тешкилатдин администрациядин эцигунрин ва ЖКХ-дин управленидин начальник Г. Гьуьсейнова кхьенвай заключенидай аквазвайвал, талукь тир къуллугърихъ галаз меслят тахьана Гь. Агьмедова «Кьасумхуьр – Дербент» шегьре рекьин къерехда, рекьин юкьвалай 11,4 метрдин мензилда, 10х7 размердин дарамат эцигиз башламишна. Идалди ада РФ-дин Градостроительный кодексдин 51-статья ва автомобилрин рекьерин къерехар ишлемишунин къайдайрин 21-статья (2007-йисан 24-июлдиз кьабулнавай 210-Федеральный Закон) векъидаказ чIурна. И кар гуьгъуьнилай райондин архитекторди, ДР-дин МВД-дин рекьера хатасузвилин гьерекатрин государственный инспекциядин Управлениди тухвай ахтармишунрини тестикьарна.
Талукь къуллугъри Гь. Агьмедоваз эцигиз гъиле кьур дарамат чукIуруниз мажбур тирди къалурна. И кар ада кьилиз акъуднач. Гьавиляй муниципальный райондин администрацияди райондин суддиз исковой заявление гана. 2010-йисан 22-декабрдиз суддин заседанидал (судья М. А. Гьасанов) и делодиз килигна. Судди Гь. Агьмедова дарамат законсуздаказ, талукь документар ва ихтияр авачиз эцигзавайди, иеси ам чукIуруниз мажбур тирди, эгер ада и кар вичи тавуртIа, дарамат чукIурдай ихтияр арзачидин пата амукьзавайди тайинарна.
Гьавиляй алай и месладин гьакъиндай чна райондин чилерин алакъайрин ва эменнидин управленидин начальник – райадминистрациядин Кьилин заместитель Назим Къурбанович Алискерован фикирни чирна.
- Гьич са касни райондин руководство, я чи управление туьквенар ва я маса къуллугъар патал дараматар эцигуниз акси я лагьана гъавурда акьун лазим туш, - лугьузва Н. Алискерова. – Акси яз, райондин руководстводи гъвечIи ва юкьван карчивал вилик тухуниз кьилин фикир, и кардал машгъул жез кIанзавайбуруз вири рекьерай куьмекар гузва. Районда гзафбуру сифте дараматар эцигиз эгечIзава, ахпа герек чарар, документар туькIуьрзава. Им дуьз туш. Дараматарни РФ-дин Градостроительный кодексдихъ, Чилин гьакъиндай Федеральный законрихъ, герек маса къараррихъ, абурун истемишунрихъ галаз кьадайвал эцигун чарасуз я. И макъалада ихтилат физвай Гь. Агьмедова эцигиз гъиле кьунвай дараматдин патахъай рахайтIа, талукь къуллугърихъ, гьа касдихъ вичихъ галазни меслят хьана, рекьин юкьвалай талукь мензилдилай мукьва авай дараматдин пай чукIурунин, дарамат маса патахъ яргъивал алаз жедайвал эцигунин меслятдал атана.
ГьакI хьайила, гьихьтин дараматар эцигиз хьайитIани, абур гьинал эцигиз хьайитIани, виликамаз талукь къуллугърихъ галаз меслят авун лазим я, - алава хъувуна эхирдай Н. Къ. Алискерова.